SEA SENSE YAWATAKA VIONGOZI WA MITAA NA VIJIJI KUTOKA WILAYA ZA LINDI,KILWA,MKURANGA, KUTUMIA VIZURI MAARIFA WALIYOPATA.

Imetumwa: June 14th, 2025

Viongozi wa mitaa na vijiji kutoka katika wilaya za Mkuranga, Kilwa na Lindi wametakiwa kutumia elimu na maarifa waliyopata kwenye kikao kazi cha siku na shirika lisilo la kiserikali la Sea Sense katika kusimamia vikundi vya BMU ili kufanya uvuvi wenye tija na endelevu.

Wito huo umetolewa na Afisa uvuvi wa Manispaa ya Lindi Essao Ngongolowo kwa niaba ya mkurugenzi mtendaji wa halmashauri ya Manispaa ya Lindi Juma Mnwele katika ukumbi wa mikutano wa hoteli ya Double M.

Akizungumza Ngongolowo amelishukuru shirika la Sea Sense kwa kuandaa kikao kazi hicho kilichowakutanisha viongozi wa serikali za mitaa katika maeneo yenye BMU.

Nae mratibu wa programu wa shirika la Sea Sense Abdallah Ngaugula amewahimiza viongozi hao kuwa na utaratibu wa kupata taarifa za utendaji wa BMU zilizopo katika maeneo yao sambamba na kusimamia kikamilifu dira na mipango kazi.

Kwa upande wao washiriki wa kikao hicho wameshukuru kwa maarifa na elimu waliyoipata huku wakiahidi kuyatendea kazi na kutimiza wajibu wao.

Kikao hicho cha siku mbili kilijumuisha viongozi wa serikali za mitaa zaidi ya hamsini kutoka Mkuranga, Somanga, Kilwa kusini, Manispaa ya Lindi na halmashauri ya Mtama.