MANISPAA YA LINDI YAADHIMISHA SIKU YA MTOTO WA AFRIKA

Imetumwa: June 14th, 2025

Halmashauri ya Manispaa ya Lindi meajiandaa kuelekea maadhimisho ya siku ya mtoto wa Africa ambayo huadhimishwa

ifikapo june 16 kwa kila mwaka na kimkoa yatafanyika wilaya ya Liwale, na siku ya leo yameadhimishwa kiwilaya ya Lindi na Mgeni Rasmi alikuwa ni Mkuu wa wilaya ya Lindi Victoria Mwanziva ambae aliwakilishwa na Peter Nambunga Mkuu wa idara ya maendeleo ya jamii manispaa ya Lindi.

Akisoma Risala kwa mgeni Rasmi mwenyekiti wa baraza la watoto manispaa ya Lindi Lawson Honda mwanafunzi wa shule ya msingi Stadium ameeleza lengo la kuanzisha kwa baraza hilo la watoto ni kupata wepesi wa kukutana na kujadili mambo mbali mbali yanayohusu haki na wajibu kwa mtoto.

Aidha katika kuelekea siku ya mtoto wa Africa, ofisi ya Mkurugenzi wa Halmashauri ya manispaa kwa kushirikiana na ofisi za watendaji wakiwemo wadau wa maendeleo, wametoa elimu kwa watoto kwa shule za msingi na sekondari kwa mada za ukatili, masuala ya lishe, sheria ya mtoto ya mwaka 2009 inayogusa haki na wajibu wa mtoto.

Ili kuhakikisha vitendo vyote vya kikatili vinaripotiwa na kutokomezwa,Haji AbdulRahmani Afisa maendeleo ya jamii dawati la msaada wa kisheria manispaa ya Lindi, amesisitiza suala la kuripoti pale ambapo mwanafunzi anapoona mwenzake anafanyiwa ukatili pindi akiwa shuleni na hata nyumbani kwani wakikaa kimya ni kusababisha athari kubwa kwenye jamii.

Katika hatua nyingine Mgeni rasmi  amewasihi watoto kuwa, kwenye haki na wajibu basi wazingatie sana haki ya kupata elimu ili waweze kutimiza ndoto zao na waweze kuwainua wazazi wao wakiwa hawana nguvu za kufanya kazi na amewata wapunguze michezo hatarishi kwa afya zao.

Ikumbukwe siku ya mtoto wa Africa ilitokana na mauaji ya halaiki dhidi ya watoto yaliyofanyika nchini Afrika ya kusini katika eneo la mji wa Soweto juni 16 1976 katika kudai haki zao muhimu ikiwemo elimu.