WIKI YA HUDUMA KWA WATEJA TANESCO WATEMBELEA MANISPAA.

Imetumwa: October 4th, 2022

Shirika la umeme tanesco wamefika katika ofisi ya mkurugenzi wa manispaa kama mteja wa umeme wakitekeleza wiki ya huduma kwa wateja.Bwana Mremi afisa masoko wa Tanesco akiambatana na watoa huduma kwa wateja ameeleza kuwa Tanesco wameimarisha sana Huduma zao na kwa sasa Wateja wanaweza kutoa taarifa za tatizo la umeme kupitia simu ya mkononi. Aidha kwa kupiga namba *152*00# tatizo la mteja litapokelewa na kuweza kupatiwa utatuzi ndani ya muda wa masaa manne.

Hata hivyo kwa sasa pia wananchi wa Lindi ambao ndio wateja wa tanesco wanaweza kuomba kuunganishiwa umeme kwa kutumia aplikeshini ya simu ya Nikonekti ambapo Bwana Mremi ameeleza kuwa kwa wastani itachukua siku 12 kuhakikisha Mteja huyo anaunganishiwa umeme.

Aidha,Tanesco wameihakikishia Manispaa kuwa kwa sasa wanaandaa miradi mbalimbali ya kusambaza umeme mijini na vijijini  na katika miradi hiyo Tanesco itazingatia pia kuhakikisha kuwa ofisi za Serikali katika maeneo hayo zinapatiwa kipaumbele ili kuweza kuwapatia huduma iliyobora wananchi. Hususan Shule na Zahanati.

Aidha Kaimu mkurugenzi wa Manispaa Dr.Stanford Mwakatage amewapongeza sana Tanesco kwa jitihada yao kuu katika kuhakikisha kuwa nishati ya umeme inapatikana hadi vijijini. na kuwaomba kuwa waendeleze kusambaza huduma ya umeme hasa kwa maeneo ya miradi mikubwa ya ujenzi inayoendelea sehemu mbalimbali na katika maeneo ambayo viwanja vingi vinatolewa kwa wananchi ili kuwezesha maendeleo.