Waziri Mwakyembe awakaribisha wawekezaji Lindi

Imetumwa: March 27th, 2019

Waziri wa Habari, Sanaa na Michezo Dk. Harrison Mwakyembe amewataka wawekezaji wakubwa na wadogo, wa ndani na wa nje kuja kwa wingi Lindi kufanya uwekezaji  kwa sababu kuna fursa nyingi ambazo hazijafanyiwa kazi.

Dk Mwakyembe aliyasema haya jana katika ukumbi wa Sea View Hotel wakati akifungua rasmi jukwaa la fursa za biashara na uwekezaji lililokuwa limeanza siku moja nyuma na kutarajiwa kumalizika tarehe 27 March.

Waziri Mwakyembe alisema Lindi ni kama jitu la miraba minne ambalo limelala, Ila sasa wakati umefika kwa jitu hilo kuamka. Akasema jukwa hili ni  sehemu nzuri kwa Mkoa wa Lindi kuionyesha Dunia fursa zilizopo kwa ajili ya kukuza uchumi pamoja na kushawishi taasisi za kifedha kutoa misaada katika kukuza uwekezaji.

Pia aliipongeza ofisi ya Mkuu wa Mkoa pamoja na Halmashauri zake kwa kushika nafasi ya kwanza kitaifa kwa kuwa na viwanda vingi vidogovidogo kuliko Mkoa mwengine wowote. Na pia alifurahishwa na bidhaa zinazotengenezwa na kuuzwa na wajasiriamali wadogo kwa kusema kuwa ni za kiwango cha hali ya juu kabisa kinachoweza shindana na bidhaa nyengine zozote.

Naye Mkuu wa Mkoa wa Lindi, Mhe. Godfrey Zambi alisema kuna sababu nyingi za wawekezaji kuja kuwekeza Lindi. Mosi ni hali ya usalama kuwa kubwa, Lindi ni moja kati ya Mikoa ambayo matukio ya uhalifu ni machache sana. Pili, Lindi kuna eneo kubwa sana kwaajili ya masuala ya utalii kama vile kumbu kumbu za vita ya maji maji vilivyoanzia kilwa, miji ya kihistoria, mijusi mikubwa (dinosaurs) pia uwepo wa fukwe nzuri. Pia alisema fursa nyengine ziko kweye sekta ya kilimo, misitu uvuvi, madini pamoja na upatikanaji wa gesi asilia katika pwani ya Lindi.

Aidha Naibu Waziri wa Nishati, Mhe. Subira Mgalu aliwahakikishia wawekezaji kuwa Serikali inafanya uwekezaji mkubwa katika masuala ya nishati katika Mikoa yote hivyo wasiwe na wasiwasi  juu ya upatikanaji wa nishati ya umeme kwa uhakika.

Jukwa hilo la fursa za biashara na uwekezaji limeandaliwa na kampuni ya tsn kwa kushirikiana na ofisi ya Mkuu wa Mkoa wa Lindi. Lindi ni Mkoa wa tisa kufanya jukwa hilo, mikoa nane iliyotangulia kufanya jukwaa hilo ni Geita, Shinyanga, Tanga, Simiyu, Mwanza, Zanzibar, Arusha na Tabora.