WAZIRI MKUU ASHIRIKI UJENZI WA KITUO CHA AFYA.

Imetumwa: October 26th, 2021

Waziri Mkuu Mh.Kasim Majaliwa Majaliwa leo 26/10/2021 akiwa kwenye ziara yake ya kupita kukagua miradi ya maendeleo mkoani Lindi ameweza kushiriki ujenzi wa kituo cha afya Mvuleni,ambacho kipo katika hatua za awali za ujenzi huo ambao utagharimu kiasi cha pesa shilingi milioni 250 kwa majengo matatu jengo la wagonjwa wa nje(OPD),maabara na kichomea taka.

Mheshimiwa Kassim Majaliwa ametoa rai kwa wananchi wa kata ya Mvuleni kuvutia umeme kwani gharama za kuvutia umeme ni ndogo ikilinganishwa na miaka ya nyuma ili kumfanya kila mwananchi aweze kumudu gharama hizo.

Vilevile Waziri amewaomba wananchi kuwa makini na mali zote za umma kwenye ujenzi wa kituo hiko cha afya na kama ikitokea mtu akaiba basi apelekwe polisi kwani wanakwamisha miradi ya maendeleo.Amesema“Tusiruhusu nondo,saruji kuibiwa kila mmoja awe mlinzi na mkigundua Fulani ameiba wala msimvumilie kamata peleka polisi,Mbunge wenu ameeleza adha mnayopata kwa adha ile sidhani kama kuna mtu atachukua nondo na saruji ili jengo liweze kuisha haraka”.

Aidha ametoa wito kwa maafisa elimu kuhakikisha fedha za ujenzi wa madarasa walizopata kuhakikisha wanaanza ujenzi mara moja.

                                 Waziri Mkuu Mh.Kassim Majaliwa akizindua madawati alipotembelea Chuo Kikuu Huria Lindi.

Mbunge wa Jimbo la Mchinga Mheshimiwa Salma Rashidi Kikwete amemuomba Waziri Mkuu kutatua changamoto ya ujenzi wa daraja linalounganisha kijiji cha Kitomanga na Mvuleni kwani imekuwa adha ya muda mrefu kwa wananchi wa vijiji hivyo.Ambapo mhandisi wa TARURA alitolea ufafanuzi juu ya utatuzi wa changamoto hiyo.

Katika ziara hiyo Mheshimiwa Waziri Mkuu ameweza pia kutembelea chuo kikuu Huria ambapo amepokea madawati kwa ajili ya shule za msingi kutoka kwa benki ya Exim na kufanya uzinduzi wa madawati hayo.

Pia ametembelea na kufanya ukaguzi wa daraja la Mnyangara ambalo ni adha kwa wanakijiji wa Mnyangara kwani inapofika kipindi cha Masika daraja hilo hufurika maji na kupelekea kutokuwa na mawasiliano baina ya kijiji cha  Mnyangara na vijiji vingine.

Waziri Mkuu alipotembelea daraja la Mnyangara.