WANAWAKE WATAKIWA KUCHANGIA KATIKA KUENDELEZA ELIMU

Imetumwa: March 6th, 2019

Wanawake wa Manispaa ya Lindi wametakiwa kuchangia katika kuhakikisha sekta ya Elimu inakua. Maneno hayo yamesemwa na Mbunge wa viti maalum Mhe. Hamida Abdallah Katika kongamano la kinamama lililofanyika katika ukumbi wa DDC tarehe 06 March ikiwa ni katika maandalizi ya kusherehekea siku ya wanamke duniani.

Akizungumza na wadau mbalimbali waliohudhuria katika kongamano hilo Mhe. Hamida alisema “yapo mambo mbalimbali ambayo yanaweza kwenda kutufikisha katika maendeleo ya viwanda. Lakini hatuwezi kufikia huku kama hatujapata Elimu ya kutosha. Sasa Elimu ndio iwe kipaumbele chetu”

Pia alizungumzia umuhimu wa kuwa na Afya kwasababu maendeleo hayawezi kuja kama watu hawana Afya njema. Hivyo, akawataka wajiunge na bima za CHF na NHIF kwa kuwa zinapunguza matumizi makubwa ya pesa katika kupata huduma za Afya.

Aliwataka wanawake wasiogope kukopa fedha katika taasisi za kibenki ili waweze kukuza mitaji katika biashara zao. Akijitolea mfano katika kongamano hilo Mhe. Hamida alisema hata yeye alianza biashara yake ya mgahawa kwa kukopa shillingi 250,000 kutoka NMB na baada ya kufanya marejesho aliweza kukopa kiasi hadi cha shillingi million 10 na kumuwezesha kuwekeza katika biashara nyengine.

Pia Mhe. Hamida aliipongeza idara ya Maendeleo ya Jamii kwa kukumbuka kushirikisha makundi mbalimbali katika shughuli hiyo ikiwemo walemavu. Ambapo aliwapa walemavu hao kiasi cha shilingi laki moja kama msaada.

Kongamano hilo lilihudhuriwa na wadau mbalimbali wakiwemo wanawake kutoka Manispaa, vikundi vya kina mama vya ujasiriamali, taasisi za kifedha, SHIVAWATA, Uhamiaji, pemwa, Jumuiya ya wanawake, Boresha Afya, vikundi vya ubanguaji n.k

Siku ya wanamke duniani itaadhimishwa katika viwanja vya shule ya Msingi Mitwero siku ya ijumaa tarehe 8 march.