UZINDUZI WA KAMPENI YA ELIMU YA USALAMA KWA WAVUVI.

Imetumwa: August 19th, 2024

Chuo cha Bahari Dar es salaam - DMI kinatarajia kuendesha Mafunzo ya kampeni ya utoaji elimu ya usalama kwa wavuvi wanaofanya shughuli zao za uvuaji wa samaki katika Mkoa wa Lindi ili kufikia lengo la kuleta ufahamu juu ya masuala ya usalama wao  na wananchi kwa ujumla.

Elimu hiyo inatarajiwa kutolewa mashuleni na Mitaani kwa muda wa siku nne na kuwafikia wavuvi zaidi ya  elfu 10.

Uzinduzi wa kampeni hiyo umefanyika Agosti 19,2024 na Mkuu wa wilaya ya Lindi Mhe. Shaibu Ndemanga, katika ukumbi wa mikutano wa Sea view Hotel ulipo Manispaa ya Lindi.

Aidha Dc- Ndemanga  amesisitiza uundwaji wa Vikundi vya ulinzi shirikishi vya Rasilimali za Bahati - BMU ili kupunguza uvuvi haramu .

Mkuu wa Idara wa Kozi za Umahiri DMI Mhandisi Deism Mlay ameeleza kuwa kupitia kampeni hiyo wavuvi watapitishwa katika kozi tatu muhimu ikiwemo kozi ya usalama baharini kwa wavuvi, kozi ya unahodha wa vyombo tofauti vya majini pamoja na kozi ya usalama katika shughuli za uvuvi.

"Ni matarajio yetu kuwa kupitia kozi hizi kutaongeza ufanisi wa wavuvi wawapo katika shughuli zao za majini, kuboresha usalama, mazingira, kupunguza ajira, vifo na upotevu wa watu majini pamoja na kuongeza uelewa wa sheria, taratibu na miongozo mbalimbali inayohusisha shughuli za uvuvi kupitia mamlaka mbalimbali kama TASAC, SOLAS, STCW-F" Ameeleza.

Mafunzo yataendelea kufanyika ndani ya Juma hili katika Maeneo mengine ya Mkoa wa Lindi ili kuboresha ufanisi katika shughuli hiyo muhimu ya Kiuchumi.