UWAJIBIKAJI KWA WATUMISHI WA UMMA

Imetumwa: August 29th, 2018

Kaimu mkurugenzi wa Halmashauri ya Manispaa ya Lindi Ndg Ashimuni Mnzava  amewataka watumishi kudumisha ushirikiano katika utendaji wa kazi na kutoa huduma bila upendeleo kwa watu  ili kuhakikisha wanafikia malengo waliyojiwekea kwa mwaka 2018/2019.

Ameyasema hayo  siku ya tarehe 28/08/2018 katika shule ya Sekondari Angaza ambapo alifanya majumuisho ya ziara ya kutembelea shule za Sekondari zilizopo katika Halmashauri ya Manispaa ya Lindi.

Akiongea na watumishi hao, Kaimu Mkurugenzi wa Halmashauri ya lindi aliwataka watumishi kuzingatia yale amabayo wanapaswa kuzingatia katika utendaji wao wa kazi ili kuepuka kukiuka kanuni ikiwa ni pamoja na kutekeleza wajibu wao ipasavyo.

Nae Afisa Utumishi Ndg Kihanza B.J alisema kuwa lengo la ziara hiyo ni kuwakumbusha watumishi wa umma juu ya haki na wajibu wao kadri ya muongozo wa sheria ya utumishi wa umma na 8 ya mwaka 2002 pamoja na marekebisho yake ya sheria na 18 ya 2007.

Afisa utumishi Ndg Ester Gama aliwasistiza watumishi kuzingatia matumizi ya mfumo wa Wizara ya Fedha ili kupata hati ya mshahara na kutunza nyaraka zao za siri  na kuepuka kumpa mtu asiyehusika taarifa za kiutumishi.

Kaimu Katibu wa TSC Ndg Mohamed Saidi ambaye nae aliambatana na kaimu mkurugenzi katika ziara hiyo alisema”zingatieni maadili popote mtakapokuwa iwe kazini au nyumbani au mtaani kwani mwalimu ni kioo cha jamii”.

Katika ziara hiyo Kaimu Mkurugenzi wa Halmashauri ya Manispaa ya Lindi alitembelea shule za Sekondari Lindi,Mkonge, Ng’apa,Chikonji,Kineng’ene,Mitwero na Angaza.