“TUNZENI UTAMADUNI KWA MAENDELEO” Dkt Harrison Mwakyembe

Imetumwa: October 25th, 2018

Waziri wa Habari na Utamaduni Dkt Harrison Mwakyembe amewataka wananchi wa Lindi kutumia dhana ya utamaduni ili kujikwamua kiuchumi na kuleta maendeleo.

Waziri Mwakyembe ameyasema hayo alipokuwa akifungua tamasha la utamaduni la watu wa Mkoa wa Lindi linalofanyika katika kijiji cha makumbusho jijini Dar es salaam leo 25/10/2018.

Mheshimiwa Mwakyembe alisisitiza wananchi wa Lindi kujishughulisha na masuala ya utamaduni  kama vile kuhifadhi na kutunza maeneo ya kihistoria yatakayowavutia watalii kutoka maeneo mbalimbali.

“Kwa kupitia utamaduni mtaweza kujikwamua kiuchumi. Amueni kufanya utamaduni kuwa ni chanzo cha kuleta maendeleo, pia nawapongeza kwa nia ya dhati kabisa na ninawasii jamii nyingine kuiga mfano wa wana-Lindi katika kuenzi utamaduni” amesema Mwakyembe.

Pia amesistiza kuwa wizara ya habari na utamaduni itaendelea kuunga mkono wadau wanaoshughulika na kazi ya kulinda na kutunza utamaduni  kwani taifa bila utamaduni ni sawa na taifa mfu.

“Suala la kutunza na kuendeleza utamaduni si suala la serikali tu, ni wajibu wa kila mwananchi  kufanya hivyo. Hivyo tusaidiane kuendeleza na kukuza tamaduni zetu” amesema Mwakyembe.

Aidha Waziri Mwakyembe amepongeza uongozi wa Mkoa wa Lindi kwa dhamira njema ya kufanya tamasha hili  la utamaduni na kuendeleza michezo kwa kujenga uwanja wa Majaliwa Stadium uliopo Wilayani Ruangwa.

Tamasha hili la utamaduni limeshirikisha wananchi wa Mkoa wa Lindi kutoka katika Halmashauri zote 6 na  limebeba kauli mbiu isemayo "Lindi utamaduni wetu, Urithi wetu kwa maendeleo" na litafanyika kwa siku 4 kuanzia 25 - 28/10/2018 katika kijiji cha makumbusho Dar  Es Salaam.