TANGAZENI VIVUTIO VYA UTALII LINDI- MHE. HASUNGA

Imetumwa: October 29th, 2018

Naibu Waziri wa maliasili na utalii Mheshimiwa Japhet Hasunga amewataka wanachi kushirikiana na Serikali kuhakikisha wanatangaza vivutio vya utalii vilivyopo katika Mkoa wa Lindi pamoja na Mikoa mingine ya kusini.

Naibu waziri ameyasema hayo leo tarehe 29/10/2018 katika sherehe ya kufunga tamasha la utamaduni la watu wa Lindi liliyofanyika katika kijiji cha makumbusho.

"Lindi ni Mkoa uliobarikiwa kuwa na vivutio vya utalii ambavyo havipatikani dunia nzima hivyo ni wajibu wa Serikali kuhakikisha miundombinu inajengwa ili watalii wa Tanzania na wasio watanzania waweze kufika katika maeneo hayo".

Aidha,Naibu Waziri amemuagiza Mkuu wa Mkoa wa Lindi kuanzisha makumbusho ya Mkoa itakayohifadhi kumbukumbu muhimu za utamaduni ikiwa ni pamoja na kutoa elimu juu ya utamadumi wetu hata kwa vizazi vijavyo.

Pia amewataka wananchi wote kukemea utamaduni ambao hatunao kwa vijana haswa wasanii ambao wamekuwa wakisahau utamaduni na mila zetu na watumie mda wao kuenzi na kuonyesha utamaduni wetu.

Sambamba na hayo ,Naibu Waziri amezitaka Halmashauri kutenga bajeti ya maadhimisho ya tamasha la Utamaduni ambalo litakuwa linaadhimishwa mwezi wa tisa kila mwaka katika kila Mkoa.

Aidha, Mkuu wa Mkoa wa Lindi Mhesimiwa Godfrey Zambi amewashukuru wadau wote waliowaunga mkono wanalindi katika kufanikisha tamasha hilo la utamaduni wa watu kutoka Lindi.