TAMASHA LA UTAMADUNI WA WATU WA JAMII YA MKOA WA LINDI

Imetumwa: October 24th, 2018

Mkuu wa MKoa wa Lindi Mhe. Godfrey Zambi amewakaribisha watanzania na wasiokuwa watanzania kwenye tamasha  la utamaduni  wa makabila ya Mkoa wa Lindi linalofanyika  katika kijiji cha makumbusho jijini Dar es salaam kuanzia tarehe 25.10.2018 na kumalizika tarehe 28.10.2018.     

“Kupata fursa ya kuonyesha utamaduni wa Mkoa ninaouongoza ni faraja kubwa sana” alisema Mkuu wa Mkoa wa Lindi.  Makabila ya lindi yanatarajiwa kuonyesha utamaduni wao wa vitu mbalimbali ikiwemo vyakula vya asili, ngoma za asili , vinywaji, nyumba pamoja na mila na desturi.                             

Mgeni rasmi kwenye tamasha hilo ni Makamu wa Rais wa Jamhuri ya MUungano wa Tanzania Mhe. Samia Suluhu ambapo atawakilishwa na Waziri wa Habari, Utamaduni, Sanaa na Michezo Dkt. Harrison Mwakyembe ambae atazindua tamasha hilo siku ya tarehe 25.10.2018 na siku ya kufunga tarehe 28.10.2018 mgeni rasmi atakuwa ni Waziri Mkuu wa Jamhuri ya Muungano wa Tanzania Mhe. Kassim Majaliwa.

Akiongea na waandishi wa habari  Kaimu Mkurugenzi wa Kijiji cha makumbusho  alisema kuwa hili ni tamasha la 27 kufanyika na lengo ni kutoa elimu kwa watanzania na wasio watanzania ili wajue utamaduni wa makabila ya Mkoa wa Lindi na kuwakaribisha watanzania na wasiokuwa watanzania kuhudhuria tamasha hilo ili wajionee wenyewe.