SIRI YA RUANGWA MARATHONI YAWEKWA WAZI.

Imetumwa: September 14th, 2024

Waziri Mkuu na Mbunge wa Jimbo la Ruangwa, Mhe. Kassim Majaliwa, ameweka wazi lengo la kuandaa Ruangwa Marathoni, iliyofanyika leo, Septemba 14, 2024, katika viwanja vya Madini vilivyopo wilayani Ruangwa, Mbio hizi ni msimu wa pili tangu kuanzishwa kwake mwaka 2023, na zimeleta hamasa kubwa ya kuimarisha afya kwa jamii kupitia mazoezi.

Mhe. Majaliwa amesema, “Ruangwa Marathoni ni mpango mkakati wa Rais wa Jamhuri ya Muungano wa Tanzania, Mhe. Samia Suluhu Hassan, wa kuwakutanisha Watanzania, kuibua mijadala ya maendeleo, kusisitiza uimarishaji wa afya yao, na kuzungumzia utekelezaji wa miradi ya maendeleo.”

Naye Naibu Waziri wa Afya, Mhe. Dkt. Godwin Mollel(Mb), amedokeza kuwa nchi inapoteza kiasi cha Shilingi Bilioni 545 kwa kugharamia matibabu ya magonjwa yasiyoambukiza, kutokana na jamii kutokuwa na utaratibu wa mazoezi, kiasi ambacho kingeweza kujenga shule mpya za msingi 1,513.

Kwa upande wake, Naibu Waziri wa Sanaa Utamaduni na Michezo, Mhe. Hamis Mwinjuma(Mb), amempongeza Waziri Mkuu kwa kuishi maono ya Rais, akisema kwamba michezo si tu inaimarisha afya, bali pia ni chanzo cha ajira. 

Msanii mashuhuri wa muziki wa kizazi kipya nchini, Nasib Abdul (Diamond Platnumz), amewataka wananchi wa Ruangwa kushukuru maendeleo yaliyoletwa na Serikali ya awamu ya sita, hasa utekelezaji wa miundombinu ya barabara, huku akisisitiza kuwa "Mpende akupendae."

Vilevile, kila mwananchi anahaki ya kikatiba kuchagua na kuchaguliwa katika uchaguzi wa Serikali za Mitaa utakaofanyika Novemba 27, 2024.