SIKU YA MTOTO WA AFRIKA MANISPAA YA LINDI YAFANYIKA KATA YA MATIMBA.

Imetumwa: June 15th, 2023

Maadhimisho hayo yamefanyika Juni 15, 2023 katika shule ya sekondari Nangaru kata ya Matimba na yamesimamiwa na idara ya maendeleo ya jamii Manispaa ya Lindi, chini ya afisa maendeleo ya jamii Moses Mkoveke yakihusisha wanafunzi wa shule za msingi na sekondari, wazazi na walezi kutoka katika kata ya Matimba, Manispaa ya Lindi.

Katika maadhimisho hayo elimu kuhusu masuala ya watoto pamoja na burudani mbalimbali kama vile ngonjera vilitolewa mbele ya mgeni rasmi pamoja na wageni waalikwa.

Mgeni rasmi kwenye maadhimisho hayo alikuwa ni diwani wa viti maalumu tarafa ya Nangaru Ashiza Mtagaluka. Kaulimbiu ya maadhimisho ya mtoto wa Afrika mwaka huu ni "ZINGATIA USALAMA WA MTOTO KATIKA ULIMWENGU WA KIDIJITALI".

Aidha, Mtagaluka amewaomba wananchi wote kuwa walinzi wa kweli kwa watoto wetu kwani wanahitaji muongozo wa maadili na usimamizi mzuri katika makuzi yao, hasa ikizingatiwa kuwa umri walio nao ndio wenye changamoto kubwa kwa matendo ya ukatili yanayojitokeza kama vile ubakaji , ulawiti, utumikishwaji katika ajira hatarishi , ukeketaji , ndoa na mimba za utotoni.

 Kwenye risala yao wanafunzi wa shule ya sekondari Nangaru wameomba matukio na Sherehe kama hizo ziendelee kufanyika katika kata yao ya Matimba ili kuongeza ari kwa wana matimba katika kutokomeza ukatili wa watoto.

Sambamba na hilo wanafunzi hao walimpongeza mgeni rasmi Mhe. Ashiza Mtagaluka kwa kutumia muda wake kushiriki maadhimisho hayo, lakini pia walitoa shukrani kwa Mkurugenzi wa Manispaa ya Lindi Juma Mnwele kuruhusu kata ya Matimba kuwa wageni wa maadhimisho hayo kwa mwaka 2023.

Katika hatua nyingine afisa maendeleo ya jamii Manispaa ya Lindi Moses Mkoveke aliongoza kikao cha siku ya kupinga ukatili wa wazee, ambapo alimuwakilisha mkuu wa wilaya ya Lindi Mhe. Shaibu Ndemanga, kikao ambacho kilifanyika katika shule ya sekondari Nangaru huku wageni waalikwa wakiwa ni wazee kutoka kata ya Matimba na kilihusisha, kijadili mambo mbalimbali kuhusu haki za wazee katika Manispaa ya Lindi.