RC-TELACK AWAPONGEZA WAKAZI WA LINDI KWA KUJITOKEZA KWENYE MAADHIMISHO YA SIKU YA MASHUJAA.

Imetumwa: July 25th, 2024

Ikiwa Leo Julai 25, 2024 ni Maadhimisho ya siku ya kumbukumbu ya Mshujaa ambayo kitaifa yanafanyika Jijini Dodoma, Mkuu wa Mkoa wa Lindi Mhe. Zainab Telack ametoa pongezi kwa wakazi wa Lindi kwa kujitokeza kwenye Madhimisho hayo ambayo kimkoa yamefanyika katika Halmashauri ya Manispaa ya Lindi , ikiwa ni kutekeleza maelekezo ya Serikali.

“ Lakini niwapongeze kwa kujitokeza kwa wingi Kuja kutekeleza maelekezo ya Serikali ya kufanya chochote kwenye siku hii ya Mashujaa, sisi tumeamua kufanya usafi na ninyi mmejitoa kuja kwaajili ya kutekeleza agizo hilo” RC- Telack.

Maadhimisho hayo Yamefanyika yakiambatana na shughuli mbalimbali za kijamii ikiwemo kufanya usafi katika soko kuu la Mkoa wa Lindi pamoja na kufanya maandamano ya amani kuelekea katika Mnara wa Mashujaa ambapo imefanyika Dua na Sala kwaajili ya  Mashujaa wetu.

Aidha RC- Telack amewaomba watumishi pamoja na wakazi wote wa Mkoa wa Lindi kuendelea na utaratibu wa kufanya usafi katika maeneo yao.

“Niwaombe tuendelee kufanya usafi, usafi ni tabia, usafi Ndio maisha. Tukiacha mji wetu ukiwa mchafu na sisi hatuna maisha, mbu watazaliwa humu, nzi watazaliwa humu tuta pata magonjwa mengi ambayo tunaweza kuyaondoa, kwa kuwa wasafi tu.” 

Sambamba na hilo ametoa wito kwa wananchi wanaoishi pembezoni mwa barabara kuacha kutoa maji machafu ndani na kumwaga kwenye mitaro iliyopo mbele ya nyumba zao.

“Na hili niwaagize maafisa Afya simamieni hilo, ukikuta mtu anamwaga maji machafu kwenye mitaro chukueni hatua, najua sheria zipo, simamieni usafi hatuna sababu ya kuona uchafu unazagaa kwenye mji huu wakati maafisa Afya wapo”.