RC-TELACK ATOA WITO KWA VIONGOZI NA WATENDAJI WA JESHI LA UHAMIAJI MKOA WA LINDI KUHAKIKISHA HUDUMA WANAZOZITOA ZINA WAFIKIA WANANCHI KWA WAKATI.

Imetumwa: April 26th, 2023

Wito huo umetolewa na Mkuu wa mkoa wa Lindi Mhe. Zainab Telack kwenye maadhimisho ya  miaka 59 ya  Muungano wa Tanganyika na Zanzibar ambayo yamefanyika tarehe 26 Mwezi wa nne kwenye viwanja vya jengo la uhamiaji mkoa wa Lindi linalopatikana Manispaa ya Lindi kata ya Msinjahili.

Mgeni rasmi kwenye maadhimisho hayo alikuwa ni mkuu wa Mkoa wa Lindi Mhe. Zainab Telack,lakini pia maadhimisho hayo yalipata kuhudhuriwa na mstahiki meya wa Manispaa ya Lindi Mhe. Frank Magali lakini pia mkurugenzi mtendaji wa Manispaa ya Lindi Juma Mnwele naye pia alikuwepo kwenye maadhimisho hayo  lakini pia viongozi na watumishi mbalimbali kutoka ndani na nje ya Manispaa ya Lindi.Maadhimisho hayo  yalikwenda sambamba na ufunguzi wa jengo la uhamiaji mkoa wa Lindi lenye thamani ya shilingi bilioni 2.2.

Sambamba na hilo kwenye maadhimisho hayo  Mhe .Telack ameomba wakazi wa Manispaa ya  Lindi kutunza mila na desturi za taifa letu ili wageni wanao kuja waweze kujifunza mazuri katika mkoa wetu, lakini pia kusimamia watoto wapate elimu ili waweze kuja kunufaika na miradi mikubwa ambayo inakwenda kujengwa katika mkoa wetu.

Aidha Mhe.Telack amewaomba wakazi wa Manispaa ya Lindi kutunza ardhi na kuweka juhudi katika kazi ili wasiwe wageni au vibarua  katika uchumi unao kuja katika mkoa wetu.Lakini pia Mhe. Telack  alitumia  nafasi hiyo kumpongeza Rais wa jamhuri ya muungano wa Tanzania Mhe. Dkt Samia Suluhu Hassan kwa kuruhusu fedha za ujenzi wa jengo hilo la uhamiaji mkoa wa Lindi ambalo limegharimu shilingi bilioni 2.2, lakini pia amewapongeza viongozi wa wizara ya mambo ya ndani chini ya waziri wao Mhe.Hamadi Masauni, katibu mkuu na maafisa wote kwa kusimamia na kutekeleza mradi wa ujenzi wa jengo hilo.Lakini pia amempongeza kamishna jenerali wa uhamiaji Anna Makangala kwa kusimamia na kukamilisha ujenzi wa jengo hilo akishilikiana na viongozi waandamizi na viongozi wote katika ofisi yake.

Vilevile Mstahiki meya wa Manispaa ya Lindi Mhe. Frank Magali  alitumia nafasi hiyo kuwahamasisha watumishi mbalimbali  kuja mkoa wa Lindi hususani ni Manispaa ya Lindi  kufanya uwekezaji kwasababu mkoa huu una vitu vingi sana vinavyofaa kwaajili ya uwekezaji ikiwemo ardhi ya kutosha pamoja na madini mbalimbali .

 Mwisho Mhe. Telack alitumia maadhimisho hayo  kugawa tuzo kwa wanafunzi wa shule za msingi na sekondari ambao wameshinda katika uandishi wa insha.