NAIBU WAZIRI OR-MUUB MHE. DEOGRATIUS NDEJEMBI AZUNGUMZA NA WATUMISHI WA MANISPAA YA LINDI.

Imetumwa: October 10th, 2022

Naibu waziri Ofisi ya Rais, Menejimenti ya Utumishi wa Umma na Utawala Bora (OR-MUUB) Mhe. Deogratius John Ndejembi amefanya mkutano na watumishi wa Halmashauri ya Manispaa ya Lindi na kusikiliza kero zao mbalimbali leo tarehe 10.10.2022 katika ukumbi wa Mt. Andrea Kaggwa.

Katika salamu na kumkaribisha Mhe. Ndejembi, Mkuu wa wilaya ya Lindi Mhe. Shaibu Ndemanga amemuahidi na kumtoa wasiwasi Mhe. Naibu waziri kwamba fedha zote zilizoletwa katika wilaya ya Lindi kwa lengo la kutekeleza miradi mbalimbali zitatumiwa kama ilivyoelekezwa na miradi hiyo itatekelezwa kwa wakati.Pia Mhe. Ndemanga alimueleza Mhe. Naibu waziri mafanikio mbalimbali yaliyofikiwa na walengwa chini ya Mpango Taifa wa kunusuru kaya maskini (TASAF) ikiwemo kutekeleza miradi mbalimbali na kukuza vipato vyao, kuunda vikundi vidogo vya kijamii vya uwekezaji, na hayo yote yatawasaidia walengwa pindi wanapohitimu (yaani kutoka kwenye mpango).

Mheshimiwa naibu waziri alianza kuwasikiliza watumishi wa Manispaa ya Lindi wakitoa kero mbalimbali kuhusu masuala ya kiutumishi na kuzitolea ufafanuzi.

Katika kutoa ufafanuzi juu ya kero mbalimbali zinazowakabili Watumishi wa Manispaa ya Lindi, Naibu waziri amesisitiza kwamba hakuna kipindi kizuri kuwa Mtumishi wa Umma kama kipindi hiki cha uongozi wa Rais Samia Suluhu Hassan kwani ameboresha maslahi ya watumishi wa Umma.Mfano kwa Manispaa ya Lindi watumishi zaidi ya 800 wameweza kupandishwa madaraja (Promotion) na Watumishi zaidi ya 300 wamelipwa Areas za mishahara katika kipindi hiki kifupi cha uongozi wa Rais Samia.

Katika hotuba yake fupi Mheshimiwa naibu waziri OR-MUUB, amewataka watumishi wa Lindi kujituma, kufanya kazi kwa weledi na kwa kufuata Sheria, Taratibu na Kanuni zilizowekwa.

Aidha Mheshimiwa naibu waziri amewasisitiza watumishi wa Umma wanaopangiwa kufanya kazi katika mkoa wa Lindi kutokuhama na kuanza kuwekeza kwani Lindi ni sehemu nzuri kwa uwekezaji.