MIKAKATI MADHUBUTI YA KUDHIBITI MLIPUKO WA MAAMBUKIZI YA VIRUSI VYA CORONA KATIKA MANISPAA YA LINDI

Imetumwa: March 20th, 2020

Kamati ya afya ya msingi ya manispaa imekaa siku ya leo tarehe 20/03/2020 kujadili mikakati ya kupambana na mlipuko wa ugonjwa wa CORONA. Kamati imejumuisha baadhi ya viongozi wa kamati ya ulinzi na usalama ya wilaya pamoja na wataalamu kutoka sekta mbali mbali za halmashauri ya manispaa ya lindi.

Mkuu wa wilaya Mh Shaibu Ndemanga(mwenyekiti wa kamati) pamoja na wajumbe wamekubaliana mikakati ifuatayo:

• Sekta, Mamlaka na taasisi mbali mbali zishirikiane kwenye hatua za kupambana na kuzuia maambukizi ya ugonjwa huu. Vyombo vya usalama vihusishwe kwa ukaribu katika hatua za kuzuia mikusanyiko ya watu isiyokuwa ya msingi ikiwemo kumbi za starehe, ufukweni, uwanja wa michezo, vigezo vya usafirishaji abiria.
• Kutoa elimu ya hatua za kupambana na maambukizi kwenye maeneo ya mikusanyiko kama sehemu za ibada, masokoni, bandarini na kwenye kivuko.
• Kuweka ulinzi kwenye bandari bubu  zote.
• Kutoa elimu kwa njia za redio  ili kuzuia mkusanyiko.
• Utaratibu wa utoaji taarifa wa mtu anashukiwa kuwa na maambukizi uandliwe na kupelekwa kwa jamii.
• Vyombo vya usalama kushirikiana na ofisi ya mganga mkuu kufanya ukaguzi wa utekelezaji wa maelekezo na maagizo.
• Sekta mbalimbali ikiwemo wafanyabiashara kushirikishwa kwenye upatikanaji wa vifaa kinga ili jamii iweze kupata kwa urahisi na kuzuia kupandiswa kwa gharama zake.

Mh Mkuu wa Wilaya ametoa rai kwa wananchi wote wa Halmashauri ya manispaa ya Lindi kuchukua hatua za tahadhari kujikinga na ugonjwa huu. Wazazi na walezi kukaa na Watoto majumbani na kutofanya safari yoyote isiyokuwa ya msingi.

Mkuu wa wilaya ya Lindi ambaye pia ni mwenyekiti wa kamati ya afya ya msingi ya Manispaa Mh. Shaibu Ndemanga(katikati) akitoa wito kwa wazazi kuweka uangalizi wa kutosha kwa watoto wao na kutowaruhusu kuzurura.