MH.ZAINAB AMEFUNGUA MILANGO YA UWEKEZAJI MKOANI LINDI.

Imetumwa: November 9th, 2021

Mkuu wa Mkoa wa Lindi Mheshimiwa Zainab Telack amesema anawakaribisha watu wote wanaohitaji kuwekeza mkoani Lindi kwani kuna rasilimali za kutosha na maeneo makubwa yenye rutuba kwa ajili ya kilimo.Ameyasema hayo leo alipokuwa kwenye kikao na Balozi wa Uturuki nchini Tanzania walipotembelea wilaya ya Lindi kwa ajili ya kuangalia fursa za uwekezaji lakini pia kujifunza mambo mbalimbali.

Telack amesema “Sisi kama Mkoa tumefurahi na tumeshukuru kwamba wameweza kufika Lindi,tumewaambia kuwa tuna madini ya kutosha lakini pia kuhusu kilimo tuna ufuta ambao ufuta huo kwa wingi unauzwa nchini kwao kwahiyo tumewakumbusha kwamba wanaufahamu ufuta huo na wamekiri kwamba wanaufahamu ila tumewaambia kwa sababu ufuta unatoa mafuta na wao   wanahitaji mafuta basi wawekeze kiwanda hapa wachakate ufuta ili kupata mafuta wapeleke ufuta kwa ajili ya kupika vitu vingine lakini pia wapeleke mafuta kwa ajili ya matumizi ya familia zao”.

Balozi ameweza kutembelea maeneo mbalimbali ikiwemo fukwe ya Umbu, eneo la mradi wa gesi ya LNG Likong’o,VETA , soko la samaki,Ghala la korosho la BUKO, Shamba la chumvi,shamba la minazi na kiwanda cha kuchakata korosho Mnazimmoja.

Pichani Balozi wa Uturuki alipotembelea  soko la samaki.

Aidha Balozi ametoa shukrani kwa Mkuu wa Mkoa,Mkuu wa Wilaya,Mkurugenzi na wote walioshiriki kwa msafara huo.Vilevile amesema amejifunza vitu vingi ambavyo hawakuwahi kufahamu ama kuona na wamefurahi kwa ukarimu waliopatiwa.Balozi ameahidi kufanya uwekezaji katika Nyanja yoyote pale ambapo watakuwa na uwezo wa kuwekeza katika sekta hiyo.