MAOMBOLEZO YA HAYATI DKT. JOHN POMBE JOSEPH MAGUFULI KIMKOA LINDI

Imetumwa: March 25th, 2021

Uongozi wa mkoa wa Lindi umefanya maombolezo ya msiba wa aliyekuwa Rais wa awamu ya tano wa Jamhuri ya Muungano wa Tanzania Hayati Dkt. John Pombe Joseph Magufuli katika uwanja wa Ilulu uliopo katika Manispaa ya Lindi.Maombolezo hayo yamehudhuriwa na viongozi mbalimbali wa dini, siasa, watumishi wa serikali pamoja na wananchi wa Mkoa wa Lindi. Shughuli hiyo ilitanguliwa na salamu za rambirambi kutoka kwa mwakilishi wa Mkuu wa mkoa wa Lindi, viongozi wa madhehebu mbalimbali ya kidini na kufuatiwa na ibada fupi iliyoongozwa na Mhashamu Askofu wa Jimbo Katoliki la Lindi Bruno Pius Ngonyani. Akizungumza katika maombolezo hayo, Mwakilishi wa Mkuu wa Mkoa wa Lindi ambaye ni Mkuu wa Wilaya ya Lindi Mhe. Shaibu Ndemanga, alisema kuwa wananchi wa Mkoa wa Lindi na Tanzania kwa ujumla wamepata pigo kubwa kwa kuondokewa na mpendwa wao na kusisitiza kuyaenzi yote mazuri yaliyofanywa na Hayati Dkt. John Pombe Joseph Magufuli.Aliendelea kusema kwamba Serikali iliyoongozwa na Hayati Dkt. John Pombe Joseph Magufuli imetekeleza miradi mingi katika mkoa wa Lindi ikiwemo ujenzi wa Hospitali za wilaya, Zahanati, shule, miradi ya maji, ujenzi wa miundombinu mbalimbali pamoja na barabara.

Aidha, Mhe. Shaibu Ndemanga aliendelea kusisitiza kwamba ipo miradi inayoendelea kutekelezwa na mingine ikiwa katika mipango ya kutekelezwa katika mkoa wa Lindi kama mradi wa gesi asilia (LNG) pamoja na ujenzi wa shule maalumu ya wasichana ambayo Hayati Dkt. Magufuli aliutaka uongozi wa mkoa wa Lindi kutenga eneo kwa ajili ya ujenzi huo na Mhe. Ndemanga aliuthibitishia uma kwamba eneo ambalo lipo Kilangala limeshatengwa na serikali imeahidi kujenga shule hiyo kwa gharama ya takribani Tzs Bilioni 4 na tayari uongozi wa mkoa umepokea Tzs Bilioni moja kwa ajili ya kuanza shughuli hiyo.Pia ameeleza kwa masikitiko makubwa kwamba alitamani jiwe la msingi la shule hiyo lingewekwa na Hayati Dkt. John Pombe Joseph Magufuli kama angelikuwa bado yupo hai.Mhe. Shaibu Ndemanga amethibitisha kupokea ujumbe kutoka kwa Rais wa Jamhuri ya Muungano wa Tanzania Mhe. Samia Suluhu Hassan wa kumtoa hofu na kumtia matumaini kwamba miradi yote iliyopangwa kutekelezwa mkoani Lindi itatekelezwa kikamilifu.

Aidha, Viongozi wa dini walisisitiza kwamba Hayati Dkt. John Pombe Joseph Magufuli alikuwa mtetezi wa wanyonge na alikuwa mcha Mungu kwani muda mwingi alimkumbuka Mwenyezi Mungu na kuwataka watanzania wote kumtanguliza Mungu katika kila jambo. Viongozi hao walitoa pole kwa Rais mteule wa Jamhuri ya Muungano wa Tanzania Mhe. Samia Suluhu Hassan, Mjane Mama Janeth Magufuli ambaye alikuwa mke wa Hayati na kwa watanzania wote kwa kuondokewa na mpendwa wao. Pia Mkuu wa wilaya ya Kilwa katika kutoa salamu za rambirambi na neno la shukrani alisema  kila Mtanzania anapaswa kujipima na kujiuliza kuwa ameifanyia nn Tanzania huku akiendelea kuyaenzi mambo yote yaliyofanya na Hayati Dkt. John Pombe Joseph Magufuli kwani kifo katika maisha ya binadamu sio nukta (kikomo) bali ni mkato.

Viongozi wa dini wakipunga mkono wa kwaheri ya kuonana kwa Hayati Dkt. John Pombe Joseph Magufuli.

Viongozi wa mkoa wa Lindi wakipunga mkono wa kwaheri ya kuonana kwa Hayati Dkt. John Pombe Joseph Magufuli.

Wanakwaya wakiimba wimbo wa maombolezo

Wanafunzi wa  Lindi sekondari wakipunga mkono wa kwaheri ya kuonana kwa Hayati Dkt. John Pombe Joseph Magufuli.

Wanafunzi wakiwa kwenye majonzi mazito kwa kumpoteza Rais muasisi wa Sera ya elimu bure.

Wananchi wa Lindi wakibubujikwa na machozi kwa kumpoteza mpendwa wao aliyekuwa Rais wa wanyonge.