MANISPAA YA LINDI YAZINDUA ZOEZI LA ANUANI YA MAKAZI.

Imetumwa: February 16th, 2022

Mkurugenzi wa manispaa ya Lindi Juma Mnwele amewataka wale wote watakaokuwa wanasimamia zoezi la anuani za makazi kwenye ngazi ya vitongoji,mtaa,kata na tarafa kwenye kwa manispaa hiyo kuhakikisha wanafanya kazi kwa umakini na weledi ili kutimizwa kwa lengo la zoezi hilo.

Akizungumza kwenye kikao kazi cha kuzindua zoezi hilo kwa manispaa ya Lindi kilichowahusisha maafisa tarafa,wenyeviti wa mitaa na watendaji wa kata Mnwele amesema zoezi hilo likifanywa vizuri,kwa ufanisi na kwa kushirikiana halitochukua muda mrefu na badala yake litafanyika ndani ya kipindi kilichopangwa.

Sambamba na hilo mkurugenzi huyo wa manispaa ya Lindi amebainisha kwamba zoezi hilo limeanza kufanyika ndani ya manispaa hiyo baada ya mkuu wa mkoa wa Lindi Zainab Telack kuzindua zoezi hilo kimkoa.

Kwa upande wake mkuu wa wilaya ya Lindi Shaibu Ndemanga ambaye alikua mgeni rasmi kwenye uzinduzi huo uliofanyika katika uwanja wa ilulu amesema moja ya faida ambayo itapatikana kwenye zoezi hilo ni kujua makazi ya watu sambamba na usalama kwa wananchi.

Katika hatua nyingine Ndemanga amesema kupitia zoezi hilo itasaidia kutoa huduma za jamii kwa wakati na hasa yanapotokea majanga kama vile ya moto ama pale kwenye eneo husika kuna mgonjwa basi kupitia anuani za makazi hakutakua na usumbufu wataalam watafika kwa wakati na kumsaidia mgonjwa.