MAKALA TASAF (PART 3): TASAF IMEYAWEZESHA MAISHA YANGU KUWA MEPESI ZAIDI

Imetumwa: June 11th, 2018

Bi Maimuna Mohamed Mpukwe ni mama mwenye umri wa miaka 54. Mama huyu anaishi na wajukuu zake watatu ambao wote wanasoma shule. Mjukuu mmoja anasoma kidato cha tatu katika shule ya sekondari Lindi, mjukuu mwingine anasoma darasa la nne katika shule ya msingi Mpilipili na wa tatu anasoma chekechea katika shule ya msingi Mpilipili. Bi Maimuna ambaye anaishi katika kata ya Makonde Mtaa wa Sheikhbad amekuwa akinufaika na Mpango wa TASAF III wa Kunusuru Kaya Maskini sana toka mwaka 2013 na hadi anahojiwa na mwandishi wa habari hizi alikuwa amepokea ruzuku mara 31.

Wakati wa mahojiano, Bi Maimuna alisema kuwa hali yake ya maisha kabla ya kutambuliwa na TASAF kama kaya maskini ilikuwa ngumu hasa katika upatikanaji wa huduma za afya, chakula na elimu kwa wajukuu zake. Alieleza kuwa wakati huo walikuwa wanapata mlo mmoja na mara chache milo miwili kwa siku. Aliendelea kusema kuwa, ilikuwa vigumu sana kwake kuweza kugharamia mahitaji ya shule pamoja na afya. Alisema kuwa wakati huo hakuwa na shughuli yoyote ya kiuchumi ya kuingiza kipato kutokana na kukosa mtaji wa kuanzisha biashara.

Kuhusiana na mtiririko wa Fedha za ruzuku katika kaya ya Bi Maimuna Mohamed Mpukwe, alikiri kuwa ruzuku yake imekuwa ikishuka kutoka Tsh 34,000.00 ambapo kwa sasa anapokea Tsh 28,000.00. Alisema kuwa japo pesa hizi zimekuwa zikipungua, lakini zinamsaidia sana kugharamia mahitaji ya wajukuu zake wanaoenda shule, kununulia chakula, kugharamia chakula cha kuku anaowafuga nyumbani kwake na kulipia gharama za matibabu kupitia Mfuko wa Afya ya Jamii (CHF). “Kabla sijaingia katika mpango huu wa TASAF nilikuwa sina uwezo wa kugharamia mahitaji yote ambayo ninaweza kuyagharamia leo hii”, alisema Bi Maimuna Mohamed Mpukwe wakati akihojiana na mwandishi wa habari hizi.

Bi Maimuna Mohamed Mpukwe alisema kuwa TASAF imemuwezesha kuanzisha huduma ya mamalishe katika makazi yake ambapo anapika na kuuza vyakula vya aina mbalimbali. Ameanzisha pia ufugaji wa kuku wa kienyeji ambao humwingizia pesa kwa kuuza mayai pamoja na kuku hai. “Kusema kweli hii biashara ya chakula inaniwezesha kupata faida ya hadi shilingi elfu ishirini kwa mwezi ambazo zinaniwezesha kugharamia mahitaji mbalimbali yangu binafsi pamoja na wajukuu wangu ninaoishi nao; kusema ukweli maisha kwangu yamekuwa mepesi sana”, alisema Maimuna Mohamed. Alisema kuwa pesa anazopata zinamwezesha kujikimu kwa kipindi chote ambacho hakuna Malipo.

Aidha, Bi Maimuna alisema kuwa anayo mambo mengi ya kujivunia ikiwa ni pamoja na kumudu kuanzisha biashara ya mamalishe pamoja na ufugaji wa kuku wa kienyeji.

Kuhusu ushauri kwa Walengwa wengine waliomo kwenye Mpango wa Kunusuru Kaya Maskini sana, Bi Maimuna Mohamed alisema kuwa anawashauri wajitahidi kuanzisha biashara ndogondogo ambazo hazihitaji mitaji mikubwa kama vile biashara ya mamalishe na babalishe. Aidha aliitaka Serikali iendelee kuzitambua kaya zingine maskini ambazo bado hazijaingia katika mpango wa Kunusuru kaya maskini ili nazo ziweze kunufaika na programu hii.

Hata hivyo Bi Maimuna Mohamed Mpukwe alisema kuwa ana mipango kadha wa kadha ya kuboresha maisha yake ikiwa ni pamoja na kupanua biashara yake ya mamalishe na kuongeza idadi ya kuku ili kuongeza uzalishaji  wa mayai