MAKALA TASAF (PART 2): TASAF IMEKUWA MKONO WANGU WA PILI KATIKA KUPAMBANA NA UMASKINI

Imetumwa: June 4th, 2018

Bi Zalia Zuberi Likoja alizaliwa miaka arobaini (40) iliyopita na kujaliwa kupata watoto nane (8) ambao alizaa na bwana ambaye amemtelekeza yeye na watoto. Kwa sasa Bi Zalia anaishi katika nyumba aliyopewa na baba yake mzazi iliyopo katika Kata ya Mtanda, Mtaa wa Mtanda Juu. Bi Zalia ni miongoni mwa Walengwa 67 wa Mtaa wa Mtanda Juu wanaonufaika na Mpango wa Kunusuru Kaya Maskini sana chini ya programu ya TASAF III. Mama huyu amesajiliwa kwa namba PSSN-LMC-02422-1 na amekuwa akinufaika na mpango huu wa Kunusuru kaya maskini sana toka mwaka 2013 ambapo ameshapokea ruzuku kwa awamu 31.

Bi Zalia Zuberi Lijoka anaishi na watoto sita (6) ambapo watoto watano (5) wapo shule ya msingi Mtanda na mtoto mmoja mwenye umri wa miezi 17 bado anahudhuria kliniki.  Kaya ya bi Zalia ina wategemezi wengine wanne (4) ambao ambao wanamtegemea kwa chakula na huduma zingine za msingi kama vile malazi na matibabu wanapougua.

Bi Zalia alikaririwa akisema kuwa, “kabla sijajiunga na Mpango wa TASAF wa Kunusuru Kaya Maskini sana, maisha yalikuwa magumu sana; nilikuwa ninamudu kununua kilo moja ya unga kwa ajili ya kupikia uji asubuhi na Ugali jioni na wakati mwingine tulikuwa tunapata mlo mmoja tu”.

Aliendelea kusema kuwa chanzo kikubwa cha mapato katika kaya yake kilikuwa ni vibarua vya kulima na kufua nguo majumbani mwa watu. Alikiri kuwa kipato kilikuwa kidogo sana kumwezesha kugharamia mahitaji ya watoto shuleni, kulipia huduma za afya na hata kuboresha makazi anayoishi. Mama huyu alisema kuwa, toka ajiunge na TASAF amekuwa na uhakika wa kupata milo mitatu kwa siku, amemudu kuwanunulia watoto wake chakula chakutosha pamoja na kulipia gharama za shule kwa watoto wake wote watano waliopo shule ya msingi.                                                                                                  

Ilifahamika kuwa, kaya hii imepokea ruzuku kwa Awamu 31 na ilianza kupokea ruzuku ya Tsh 34,000.00 ambayo baadaye ilipanda hadi Tsh 48,000.00 na kwasasa inapokea Tsh 52,000.00. Ruzuku hii imeifanya kaya hii kushuhudia mabadiliko ya aina tofauti tofauti kama alivyoelezea Bi Zalia Zuberi Lijoka; “ruzuku ya TASAF imeniwezesha kusomesha watoto wangu shule ya msingi, ninamudu kuwanunulia mavazi na sare za shule, kugharamia huduma za matibabu pamoja na kuboresha malazi yao kwa kuhakikisha kuwa wanalala ndani ya vyandarua”.

Aidha, Bi Zalia alisema kuwa  pesa anazozipata kutokana na TASAF III na elimu ya Kilimo cha mjini aliyoipata wakati wa kutekeleza miradi ya ajira ya muda vimemwezesha kuanzisha bustani yake ya mbogamboga ambayo inamwingizia wastani wa Tsh 3,000.00 kwa wiki. Chanzo kingine cha Fedha kwa Bi. Zalia ni pamoja na kuvunja mawe na kuuza kokoto ambapo ndoo ndogo ya lita 10 huuzwa Tsh 700.00. Alisema kuwa kipato anachopata huwa kinamwezesha kujikimu mwezi ambao hakuna hakuna Malipo.

“Kutokana na mimi kuwa kwenye mpango pamoja na kuongezeka kwa ruzuku, nimemudu kuanzisha bustani ya kilimo cha mboga mboga, biashara ya kuvunja na kuuza kokjoto pamoja na kujiunga katika Kikundi cha Kuweka Akiba na Kuwekeza”, alisema Zalia Zuberi Lijoka. 

• Hata hivyo Bi Zalia aliielezea mipango yake ya baadae ya kuondokana na umaskini kuwa ni pamoja na;
• Kuanzisha biashara ya mkaa
• Kupanua eneo la bustani
• Kuendelea kuwa katika vikundi vya COMSIP

Taarifa hii imeandaliwa na Ofisi ya TASAF Manispaa ya Lindi

Mei, 2018