MAADHIMISHO YA SIKU YA WANAWAKE DUNIANI

Imetumwa: March 9th, 2019

Wanawake wametakiwa kujitokeza kutoa taarifa za matendo ya unyanyasaji na ukatili dhidi ya wanawake. Maneno hayo yamesemwa na Mkuu wa Wilaya ya Lindi Mhe. Shaibu Ndemanga katika maadhimisho ya siku ya wanawake duniani yaliyofanyika katika viwanja vya shule ya Msingi Mitwero.

Akizungumza wakati anahutubia Mhe. Ndemanaga alisema kuwa takwimu za shirika la Afya duniani zinaonyesha kuwa asilimia 35 ya wanawake ulimwenguni ni wahanga wa vipigo na ukatili wa kingono. Kwa hapa nchini ukatili huu bado ni mkubwa jambo ambalo linaligharimu taifa kwa kiwango kikubwa katika nyanja tofautitofauti kwa kuwa unazorotesha Afya za wanawake. Kwa mwaka 2019 jeshi la polisi nchini limepokea matukio 4,423 ya ubakaji, 1,801 ya shambulio, 1,021 ya mashambulio ya kudhuru mwili na matukio ya kujeruhi 819.

Kwa upande wa Manispaa ya Lindi matukio ya ukatili kwa wanawake yaliyoripotiwa polisi kwa kipindi cha mwaka mmoja ni 21 tu. Lakini hii haimaanishi kuwa matukio hayo ni machache bali matukio mengi yamekuwa hayaripotiwi katika vyombo husika. Hivyo, Mkuu wa Wilaya akatoa wito kwa jamii kuripoti matukio haya na yasiishie majumbani tu kwa kuwa madhara yake ni makubwa sana.

Aidha, Afisa maendeleo ya jamii Bi. Miriam alisema wanawake ni nguzo muhimu katika maendeleo ya jamiii na taifa kwa ujumla lakini ni kwa muda mrefu wamekuwa wakiachwa nyuma kwa fikra kuwa hawana uwezo wa kuchangia katika maendeleo, jambo ambalo si kweli.

Maadhimisho ya siku ya wanawake duniani hufanyika kila tarehe 8 ya mwezi wa tatu ikiwa ni kumbukizi ya juhudi za wanawake kudai usawa katika jamii. Maadhimisho ya mwaka huu ni ya 108 kufanyika tangu siku hiyo ianze kusherehekewa rasmi mwaka 1911.

Kwa Wilaya ya Lindi siku hii hufanyika kwa kupokezana na Halmashauri ya Wilaya ya Lindi, ambapo mwaka huu yameratibiwa na Manispaa ya Lindi na kufanyika katika viwanja vya shule ya Msingi Mitwero. Maandalizi ya sherehe hii yalianza tangu tarehe nne ambapo wanawake wa Manispaa walianza kwa kushiriki katika ujenzi wa Zahanati ya Banduka, zoezi ambalo lilifanyika kwa siku mbili. Tarehe 6 kulikuwa na kongamano la kuwajengea uwezo wanawake ili waweze kujiajiri na hatimae kujiletea maendeleo endelevu. Tarehe saba walitembelea Watoto katika shule za sekondari za bweni na kuwapa elimu ya hedhi salama pamoja na namna ya kujikinga na mambo hatarishi. Na tarehe nane ambayo ndio siku ya kilele, kabla ya kufika katika viwanja vya sherehe wanawake hao walitembelea wagonjwa katika hospitali ya rufaa ya Sokoine na kuwapa misaada mbali mbali jambo ambalo lilipongezwa sana na Mkuu wa Wilaya.

“kitendo hiki kinaonyesha wazi ni kwa namna gani kina mama mnahuruma, mnaupendo wa kweli na mnatambua shida za kina mama wengine. Hongereni sana” alisema Mhe. Ndemenga.

Siku ya wanawake duniani mwaka huu ilikuwa na kauli mbiu “badili fikra kufikia usawa kijinsia kwa maendeleo endelevu”.