MAADHIMISHO YA KUPINGA UKATILI WA KIJINSIA YAADHIMISHWA KILANGALA

Imetumwa: December 10th, 2021

Maadhimisho ya kupinga ukatili wa kijinsia kwa Halmashauri ya Manispaa ya Lindi yamefanyika kijiji cha Kilangala leo tarehe 10/12/2021 ambapo mgeni rasmi ni Afisa Tarafa wa Mchinga Ndugu Hadija Mringo akimuwakilisha Mkuu wa Wilaya ya Lindi Ndugu Shaibu Ndemanga.Kauli mbiu ya mwaka huu ni “EWE MWANANCHI KOMESHA UKATILI WA KIJINSIA SASA”.

Mgeni rasmi amewaasa viongozi na watendaji wa BAKAID kuhakikisha wanafuata sheria na taratibu wanapotekeleza shughuli za mradi husika.Amesisitiza sana hilo ili jamii iwe salama na iweze kuwajibika kwa vitendo vyake.

Aidha,ameishukuru Halmashauri ya Manispaa pamoja na wadau wa BAKAID kwa kuelekeza miradi katika maeneo tofauti na ni maeneo muhimu katika wilaya yetu,Lakini pia amewaomba BAKAID kupanua eneo la utekelezaji hususani  Halmashauri ya Mtama.

                                                                Mgeni rasmi akihutubia.

Mkurugenzi wa  BAKAID ameelezea mafanikio waliyoyapata kupitia programu wanazoziendesha kupitia BAKAID ni pamoja na kuanzisha vikundi mbalimbali vya ujasiriamali vikundi 6 vyenye watu 128 , kuanzisha vikundi [VICOBA] 20 na wanachama 260  na kutoa mitaji, kutoa elimu kwa viongozi wa dini wapatao 220 juu ya ukatili wa kijinsia na afya ya uzazi, vikundi 5 vya kilimo cha mbogamboga vyenye wanachama 340, kutoa machapisho mbalimbali yahusuyo kupinga ukatili wa kijinsia na afya ya uzazi yapatayo 4200  yamesambazwa kwa jamii n.k.

Kupitia risala iliyosomwa Afisa Ustawi wa jamii Bwana Fanuel Mchau ameweza kutoa changamoto kwa mgeni rasmi ambapo changamoto hizo ni pamoja na uhaba wa vitendea kazi ikiwemo usafiri ili kuweza kutembelea maeneo ya pembeni ya mji, wananchi kumaliza kifamilia matatizo yanayotokana na ukatili wa kijinsia kwa wanawake na watoto, baadhi ya wananchi kutokubali kutoa ushahidi kesi inapofikishwa mahakamani na wanaume kutokuripoti matukio ya ukatili wanayofanyiwa kwa kuona aibu.                                                                                       Aidha, ametoa maoni/mapendekezo kwa kupatiwa vitendea kazi, mapambano ya kupambana na ukatili kupewa kipaumbele kwenye bajeti ili kurahisisha kazi ya kuzungukia kwenye jamii pia wadau wajitokeze wengi Zaidi ili kuongeza nguvu ya kupambana na changamoto ya ukatili wa kijinsia kwa wanawake na watoto.

Diwani wa kata ya Kilangala Mhe.Ally Salum Nawete amewaomba walimu kutoa elimu kwa wanafunzi juu ya ukatili wa kijinsia kwa namna gani ilivyo na kama wakifanyiwa ama kuona matendo ya ukatili kujua waripoti kwa nani.