MAADHIMISHO YA JUMA LA ELIMU MKOA WA LINDI

Imetumwa: May 31st, 2018

Maadhimisho ya juma la elimu kwa Mkoa wa Lindi yamefanyika hapo jana katika ukumbi wa kagwa uliopo Manispaa ya Lindi na kuhudhuriwa na wadau mbali mbali wa elimu wakiwemo walimu, wanafunzi maafisa wa elimu pamoja na mashirika binafsi.

Mgeni rasmi katika sherehe hiyo alikuwa Mkuu wa Wilaya ya Lindi Mhe. Shaibu Ndemanga ambaye alikua akimuwakilisha Mkuu wa Mkoa wa Lindi Mhe. Godfrey W. Zambi.

Akizungumza katika sherehe hizo mkuu wa Wilaya ya Lindi alitoa pongezi kwa mkoa wa Lindi kwa kuwa elimu imekua ikiimiarika mwaka hadi mwaka kwa ngazi zote za elimu kuanzia elimu ya msingi hadi sekondari.

“Haitofurahisha na wala haipendezi kama Mkoa wa Lindi ukishika namba za mwisho kila mwaka” alisema Mkuu wa Wilaya “namna pekee ya kuwasaidia watu wa Lindi ni kwa kuwapa elimu”

Maadhimisho hayo yaliambatana na utoaji wa zawadi kwa waliofanya vizuri katika mitihani ya Taifa ya darasa la nne na la saba kwa upande wa elimu ya msingi, na kidato cha pili na cha nne katika elimu ya sekondari. Zawadi hizo zilitolewa kwa makundi ya wanafunzi, shule na halmashauri.

Halmashauri ya Manispaa ya Lindi iliweza kuibuka kidedea kwa kushika nafasi ya kwanza kwa ufaulu wa mitihani ya kumaliza darasa la saba na mtihani wa kidato cha pili.

Utoaji wa zawadi hizo ulikuwa na lengo la kupeana hamasa na kuwa ni chachu kwa wengine kufanya vizuri, pia ikiwa ni katika kutekeleza azimio la mkutano mkuu wa wadau wa elimu uliofanyika tarehe 6 mwezi wa tatu, la kutoa motisha kwa wadau wa elimu.

Aidha, Mhe. Shaibu Ndemanga alitoa agizo kuwa hadi kufika tarehe 20 mwezi wa sita Halmashauri zote ziwe zimetekeleza maazimio ya mkutano wa wadau wa elimu ambao ulifanyika. Pia akasema kutakuwa na mkutano mwengine wa wadau wa elimu ambao utajadili kwa kina suala la elimu mkoani Lindi na kufanya tathmini ya maendeleo ya utekelezaji wa maazimio ya mkutano wa awali.