KERO YA UMEME LINDI IMEFIKIA TAMATI

Imetumwa: May 22nd, 2018

Kwa kipindi kirefu wakaazi wa Mkoa wa Lindi wamekuwa wakikumbwa na adha ya umeme. Haikua ni ajabu kwa umeme kukatika zaidi ya mara 10 kwa siku. Jambo ambalo lilikuwa linawakera wananchi na kukwamisha shughuli nyingi za kiuchumi. Lakini kero hiyo sasa imefikia mwisho.

Hiyo ni baada ya Mkoa wa Lindi pamoja na Mtwara kuunganishwa rasmi katika grid ya taifa. Sherehe za kuunganishwa mikoa hii miwili katika grid ya taifa ilifanyika hapo jana katika Kijiji cha Mahumbika na kuongozwa na Waziri Mkuu wa Jamuhuri ya Muungano wa Tanzania Mhe. Kasim Majaliwa akisindikizwa na Waziri wa Nishati Dkt Medard Kalemani pamoja na viongozi wengine wa kitaifa na Mkoa.

Mhe. Majaliwa akizungumza katika shughuli hiyo alisema kuwa kile kilio cha wananchi sasa kimefikia mwisho. Wananchi wategemee kupata umeme wa uhakika kwa masaa 24.

“Hapa ni umeme masaa ishirini na nne, kwa hiyo tafsiri ya Serikali ya kusema umeme ni wa kutosha hilo sasa tuna uhakika nalo, umeme rahisi, bei mmeisikia (ambayo ni shilingi 27,000/= tu),  wa uhakika kwa sababu unawaka masaa yote ishirina na nne. Kwa hili lazima tumpongeza Mh. Rais John Pombe Magufuli, Waziri wa Nishati na bodi nzima” alisema waziri mkuu baada ya kufanya uzinduzi wa uunganishwaji huo.

Aidha  wakizungumza kwa nyakati tofauti viongozi wa Mkoa wa Lindi wakiongozwa na Mkuu wa Mkoa, Mhe. Godfrey Zambi waliishukuru Serikali kupitia Wizara ya Nishati na Tanesco kwa kufanikisha zoezi hilo. “Tulipoambiwa kuwa kituo hiki (cha Mahumbika kinachoonganishwa katika grid ya taifa) kinajengwa tuliona kuwa haiwezekani, lakini Serikali kwa kupitia Wizara ya Nishati chini ya Waziri Kalemani, pamoja na shirika la umeme Tanesco, walituambia kwamba hili jambo linawezekana. Na sasa limewezekana” , alisema Mhe. Zambi.

Pia Mhe. Zambi alichukua fursa hiyo kuwakaribisha wawekezaji mbalimbali hususani wa viwanda ambao walikua wakisita kuja kuwekeza mkoani Lindi kwa kuhofia tatizo la umeme.

Licha ya kuwapongeza waliofanikisha mradi huo na kuwahakikishia wananchi na wawekezaji juu ya uhakika wa umeme mkoani Lindi kwa sasa, Waziri Mkuu aliwataka wananchi wawe mstari wa mbele katika kulinda miondombinu hiyo ya umeme na kuhakikisha kuwa aiharibiwi na kufanyiwa hujuma.

Pia aliwaka wananchi watumie nafasi hii ya umeme katika kuhakikisha wanafanya shughuli za kimaendeleo zenye kuleta tija na kuongeza kipato. Na akasisitiza kwa viongozi wahakikishe kuwa taasisi zote za kiserikali husani shule na vituo vya kutolea huduma za afya vinapata umeme.

Uunganishwaji huu umekuja muda muafaka hasa kwa Manispaa ya Lindi amabapo inaelekea katika utekelezaji wa sera ya uchumi wa viwada.