KERO YA MAJI SASA BASI

Imetumwa: September 20th, 2018

Halmashauri ya Manispaa ya Lindi imedhamiria kutatua kero za maji kwa wananchi wake katika mitaa ya Nandambi na Mtutu iliyoko kata ya Tandangongoro.

Hayo yamesemwa na Mkuu wa Wilaya ya Lindi Mhe. Shaibu Ndemanga alipokuwa akiongea na wananchi wa mitaa hiyo kwenye hafla iliyofanyika ya kukabidhi mradi huo wa Maji kwa Mkandarasi ambaye ni Halem Constructions Limited ya Dar es Salaam.

Katika Hafla hiyo Mkuu wa Wilaya ya Lindi  aliwataka wananchi kuujua Mradi ikiwa ni kujua kiasi cha pesa kitakachotumika na kusistiza kuwa mradi huo ni wa kwao hivyo wanatakiwa kushiriki vema kwa kujitoa na kulinda mali ambazo zitasaidia katika utekelezaji wa Mradi.

Akipokea mradi huo, Meya wa Manispaa Mhe. Mohamedi Lihumbo amewataka vijana kuchangamkia fursa ya ajira ambazo zitajitokeza kipindi cha utekelezaji wa mradi huo na kumtaka mkandarasi kutumia nguvu kazi inayopatikana katika maeneo hayo.

Mkurugenzi wa Manispaa ya Lindi Ndg. Jomaari Satura aliwataka wananchi wa mitaa hiyo kumpa mkandarasi ushirikiano katika kutekeleza mradi huo ili kufanikisha kuukamilisha kwa wakati uliopangwa.

Nae Diwani wa kata ya Tadangongoro Mhe Nyanga M Nyanga aliishukuru Serikali kuu inayoongozwa na Mhe Raisi Dkt John Pombe Magufuli kwa kuleta fedha kwa ajili ya mradi huo kwani uwepo wa maji katika mitaa hiyo utatatua  kero kwani wananchi wamekuwa wakipata shida ya kufata maji umbali mrefu.

Akisoma Taarifa ya Utekelezaji wa Mradi huo, Mhandisi wa maji wa Manispaa Eng Fidelis Mayombo alisema kuwa Mradi huo utagharimu kiasi cha shilingi 825,284,801 za kitanzania na utakapokamilika unatarajia kuwahudumia watu zaidi ya 4290 na mradi unatarajiwa kukamilika kwa mda wa miezi sita.