WATUMISHI TUONGEZE BIDII KWENYE KAZI KWA MWAKA 2023-DC NDEMANGA

Imetumwa: February 4th, 2023

Mkuu wa wilaya ya Lindi, Mhe Shaibu Ndemanga ameongea na watumishi mbalimbali kwenye sherehe ya kuukaribisha mwaka mpya,iliyo andaliwa na Halmashauri ya Manispaa ya Lindi.Sherehe ambayo imefanyika katika viwanja vya Ngongo JKT,ikihusisha watumishi kutoka katika Halmashauri mbili ambazo ni Halmashauri ya Mtama na Halmashauri ya  Manispaa ya Lindi.

Kwenye hotuba yake fupi mhe, Ndemanga alisema kwa mwaka huu 2023 tuna kauli mbiu yetu ambayo ni "yasiyo wezekana yana kwenda kuwezekana".Lakini pia mhe Ndemanga alisisitiza watumishi waongeze bidii kwa mwaka huu 2023,vile vile aliomba watumishi waendelee kushirikiana kwa huu mwaka 2023.

Lakini pia alizungumzia suala la kusimamia miradi ikiwemo miradi ya barabara,maji pamoja na umeme vijijini.Vilevile alizungumzia suala la uwepo wa ujenzi wa chuo kikuu cha Dar es salaam ndaki ya kilimo chuo ambacho kinakwenda kujengwa eneo la Ngongo,vilevile chuo cha ufundi pamoja na mradi wa LNG.Pia alizungumzia miradi mikubwa ya maji ambayo inapatikana katika Halmshauri ya Mtama,hivyo kwa kusimamia miradi hii na ikapelekea kufanikiwa basi kila wilaya itakuwa imefikia takribani 95% ya usambazaji wa maji

Sambamba na hilo mhe, Ndemanga  alitoa maelekezo kwa wakurugenzi wa Halmashauri ya Mtama na Halmashauri ya Manispaa ya Lindi kwenda kukaa na wataalamu wao na  kuanzisha utaratibu wa kukutana katika Halmashauri hizi mbili kwenye Mabonanza lakini pia kwenye  mikutano ya kushauriana mara kwa mara,angalau mara moja kwa kila mwezi.Lakini pia alisisitiza uwepo wa mabonanza haya kwasababu yatasaidia kujenga afya,urafiki pamoja na kujifunza.Vilevile alizungumzia suala la kukaa nauongozi wa JKT Ngongo ilikuweza kurudisha ule utaratibu wa kukutana katika viwanja hivyo kwa kuchoma nyama,kuzungumza na kubadilishana mawazo ili eneo hilo liwe hai kwa wakati wote hata baada ya maonyesho ya nane nane.

Baada ya mgeni rasmi kutoa neno la ufunguzi wa sherehe hiyo alipata kutoa zawadi ya shampeni kwa watumishi waliohudhuria katika sherehe hiyo kama ishara ya umoja,upendo kwa watumishi wote.

Awali watumishi kutoka katika Halmashauri ya Mtama na Manispaa walipata kuungana pamoja kwenye Bonanza hilo ambalo lilifanyika katika viwanja vya ilulu,Bonanza ambalo limehusisha michezo mbalimbali ikiwemo mpira wa miguu,kikapu, rede,kukimbia na magunia pamoja na riadha. Kwa ujumla matokeo ya michezo hiyo yote yalikuwa mazuri kwa Halmashauri ya Manispaa ya Lindi kupata matokeo mazuri kwa takribani michezo yote.

Mwisho mkurugenzi wa Halmashauri ya Manispaa ya Lindi alitoa neno mbele ya mgeni rasmi kwa kumuomba mgeni rasmi atoe zawadi kwa watumishi watatu  ambao wameondoka katika Halmashauri yetu akiwepo injinia Godfrey Msoma ambaye kwasasa  yupo mamlaka ya viwanja vya ndege,lakini pia  mtumishi mwingine ambae ni Bwana Muwonge ambaye kwa sasa yupo bodi ya Korosho,pamoja na mwanasheria Doto shija ambaye kwa sasa yupo ofisi ya mkuu wa mkoa wa Katavi.