WANAWAKE WAHIMIZWA KUTUMIA NISHATI SAFI YA KUPIKIA.

Imetumwa: March 6th, 2025

Ikiwa tunaelekea kwenye Maadhimisho ya siku ya Wanawake Duniani hapo Machi 08,2025 Wanawake kanda ya Kusini wamehimizwa kutumia Nishati safi ili kuendelea kutunza mazingira.

Wito huo umetolewa Leo Machi 06,2025 na waziri mkuu wa Jamhuri ya Muungano wa Tanzania Mhe.Kassim Majaliwa Majaliwa kwenye Kongamano la Maadhimisho ya siku ya Wanawake Duniani kanda ya Kusini lililofanyika katika uwanja wa maegesho uliopo Nachingwea mkoani Lindi.

Aidha wito huo umetolewa pia Kwa taasisi zote za Elimu, majeshi pamoja na Magereza kutumia Nishati safi za kupikia.

Sambamba na hilo Majaliwa amewaomba wazazi kuwa na uhakika na Afya za watoto wao Kwa kuwapatia bima za Afya ambazo zitakuwa Zina wasaidia pindi watakapokuwa wamepata changamoto za kiafya.

Lakini pia Majaliwa amewaomba Wanawake kuendelea kuhamasishana kutumia fursa zilizopo kwenye maeneo yao ikiwa ni pamoja na uwepo wa madirisha yanayotoa mikopo kama vile mabenki, Halmashauri pamoja na taasisi mbalimbali za kifedha, lakini pia kuhakikisha Wananchi wanaepukana na mikopo ya kausha damu Kwani haikubaliki na huathiri maendeleo na mwenendo wa mwanamke au mjasiliamali yeyote.

Naye Mkuu wa Mkoa wa Lindi Mhe.Zainab Telack ametumia nafasi hiyo kumpongeza Rais wa Jamhuri ya Muungano wa Tanzania Mhe. Dkt. Samia Suluhu Hassan Kwa kuwezesha ongezeko la uzalishaji wa mazao ya kilimo Kwa Mkoa wa Lindi pamoja na kanda ya Kusini Kwa ujumla 

Pamoja na hayo RC, Telack ameishukuru serikali Kwa kutoa pembejeo bure Kwa wakulima ambazo Kwa kiasi kikubwa zimepelekea kuongeza hali ya uzalishaji wa mazao ya kilimo Kwa Mkoa wa Lindi.

Ikumbukwe kuwa kilele Cha Maadhimisho ya siku ya Wanawake Duniani ni Machi 08, 2025 na kwa Mkoa wa Lindi kitafanyika Wilayani Nachingwea ambapo Wanawake wa Halmashauri ya Manispaa ya Lindi wamejipanga kisawasawa kushiriki katika Maadhimisho hayo ambayo kauli mbiu yake inasema 

"Wanawake na wasichana 2025,tuimarishe haki usawa na Uwezeshaji"