WAJASIRIAMALI MANISPAA YA LINDI WAPIGWA MSASA ELIMU YA UJASIRIAMALI.

Imetumwa: March 13th, 2025

Wajasiriamali Halmashauri ya Manispaa ya Lindi wamepata mafunzo kuhusu Elimu ya ujasiriamali ili kuweza kuongeza thamani ya bidhaa na Huduma wanazozitoa lakini pia kuwa na namna Bora ya kujiongezea vipato vyao.

Elimu hiyo imetolewa leo  machi 13 , 2025 Kwa wajasiriamali pamoja na viongozi wa VIKOBA Manispaa ya Lindi katika ukumbi wa mikutano Lindi Sekondari.

Akiongea na washiriki hao mara baada ya ufunguzi wa mafunzo hayo mkuu wa Wilaya ya Lindi Mhe. Victoria Mwanziva amesisitiza washiriki hao kuwa na umoja na mshikamano katika vikundi vyao.

Aidha amewaomba kuchangamkia fursa ya mikopo 10% inayotolewa na Halmashauri Kwa Vijana, Wanawake na wenye ulemavu, mikopo ambayo haina riba.

Naye Mkuu wa idara ya maendeleo ya Jamii Halmashauri ya Manispaa ya Lindi Peter Nambunga amewaomba washiriki hao kuwa na ushirikiano katika masuala mbalimbali kwenye vikundi vyao, lakini pia kuhakikisha wanakuwa na vitambuliaho vya wajasiriamali ili waweze kutambulika wao na shughuli zao.

Akitoa Elimu ya umuhimu wa VIKOBA Kwa washiriki hao Afisa maendeleo ya Jamii kata ya Kitumbikwela January kazimoto amesema VIKOBA husaidia kutatua matatizo ambayo mtu mmoja au familia isingeweza kuyatatua, lakini pia husaidia kuleta maendeleo Kwa Jamii hasa zenye hali duni, matumizi Bora ya rasilimali pamoja na kuleta upendo, mshikamano na amani katika Jamii.

Nao washiriki wa mafunzo hayo wameipongeza idara ya maendeleo ya Jamii Halmashauri ya Manispaa ya Lindi Kwa kuandaa mafunzo hayo muhimu kwao ambayo yanakwenda kuwasaidia katika kukuza shughuli na biashara zao.

Licha ya kupata Elimu ya ujasiriamali washiriki hao pia wamepata kujifunza kuhusu Elimu ya uimarishaji na uundaji wa vikundi, Elimu ya utunzaji wa kumbukumbu, Elimu ya uongozi, Elimu ya masoko na leseni, matumizi sahihi ya mikopo na uendeshandaji wa vikundi, fursa za kibenki pamoja na elimu ya msaada wa kisheria kutoka Kwa dawati la msaada wa kisheria (Mama Samia Legal Aid Campaign).