UTEKELEZAJI WA MRADI WA GESI ASILIA LIKONG'O (LNG) UTAPELEKEA MAENDELEO KATIKA MKOA WA LINDI NA TAIFA KWA UJUMLA : KASSIM MAJALIWA.

Imetumwa: August 28th, 2023

Waziri mkuu wa jamhuri ya muungano wa Tanzania Mhe. Kassim Majaliwa Majaliwa (MB) amepongeza uwepo wa mradi wa kusindika na kuchakata gesi asilia (LNG) katika eneo la Likong'o Manispaa ya Lindi.
Pongezi hizo amezitoa Agosti 26, 2023 katika kilele cha maonesho ya madini na uwekezaji yaliyofanyika wilayani Ruangwa ambapo mgeni rasmi alikuwa ni waziri mkuu wa Jamhuri ya muungano wa Tanzania Mhe. Kassim Majaliwa Majaliwa (MB).

Aidha amesema utekelezaji wa mradi huo wa gesi asilia Likong'o (LNG) utapelekea manufaa mbalimbali katika taifa letu ikiwemo uzalishaji wa ajira za Kudumu na za muda mfupi kwa wakazi wa Manispaa ya Lindi na Mkoa wa Lindi kwa ujumla, pia Mkoa utaendelea kupata Maendeleo kupitia mauzo ya bidhaa na huduma mbalimbali wakati wa utekelezaji wa mradi huo.

Lakini pia alitumia nafasi hiyo kuwaomba wakazi wa Mkoa wa Lindi pamoja na taasisi mbalimbali kutumia fursa hiyo ya mradi wa gesi asilia (LNG) katika kujipatia vipato.

Sambamba na hilo amesisitiza wakazi wa Mkoa wa Lindi kuanza kujiandaa kufanya Shughuli mbalimbali za kiuchumi kupitia mradi huu wa gesi asilia wa (LNG) ikiwemo kujenga hoteli za kitalii, nyumba za wageni, kuboresha huduma za utoaji wa chakula pamoja na huduma bora za usafirishaji.

Katika hatua nyingine mkuu wa wilaya ya Lindi Mhe. Shaibu Ndemanga akimuwakilisha mkuu wa Mkoa wa Lindi Mhe. Zainab Telack amesema moja ya changmoto inayo ikabiri sekta ya madini Mkoa wa Lindi ni wawekezaji kushikiria maeneo kwa muda mrefu na kuwanyima fursa wawekezaji wapya pamoja na wakulima wa chumvi kukosa soko la bidhaa zao

Pamoja na hayo ameiomba serikali kujenga uchumi wa viwanda katika Mkoa wa Lindi ili kukuza ajira alikadhalika kupandisha bei ya bidhaa zinazo zalishwa ili kuimarisha Mkoa wa Lindi.