Tamko la Mkuu wa Wilaya ya Lindi kuhusu zahanati ya Mnali

Imetumwa: August 28th, 2022

Kufuatia Habari zilizokuwa zikienea katika mitandao kuhusu changamoto ya chumba cha kujifungulia katika zahanati ya Mnali, Mkuu wa wilaya ya Lindi Mhe. Shaibu Ndemanaga amekutana na waandishi wa Habari ili kutoa ufafanuzi.

Akizungumza na waandishi, Mkuu wa wilaya alisema kuwa Wilaya ya Lindi ina zaidi ya zahanati 23 zilizojengwa miaka ya 1980 na zahanati ya Mnali ni mojawapo. Kutokana na ramani za ujenzi wa zahanati wa wakati huo chumba cha kujifungulia kipo ndani tofauti na ramani za sasa ambazo chumba cha kujifungulia kipo nje.

Aidha alisema japo chumba hiko kipo ndani lakini ni katika vyumba ambavyo vina usiri mkubwa sana.

Pia baada ya kufanya tathmini ya mahitaji ya zahanati ya Mnali pamoja na maeneo mengine ya Manispaa ya Lindi ilibainika kuwa kuna maeneo ambayo yana wakazi wengi na hakukuwa na zahanati hivyo jitihada kubwa ilifanyika kuhakikisha maeneo hayo yanapata huduma hiyo.

Na pia katika zahanati hiyo hiyo ya Mnali ilionekana kuna matatizo mengine ambayo yalihitaji ufumbuzi wa haraka, matatizo hayo ni ukosekanaji wa vyoo, ukosefu wa nyumba za watumishi, uchakavu wa jengo.

Katika kutatua changamoto katika zahanati hiyo, serikali ilishaanza kufanya mambo kadhaa ikiwemo ujenzi wa nyumba za watumishi, ujenzi wa vyoo pamoja na ukarabati wa jengo. Hata hivyo zahanati ya Mnali ipo katika mpango wa maboresho zaidi na Mhe. Mkuu wa wilaya amewataka wakazi wa Mnali kuondoa shaka kwa kuwa kero hiyo inakwenda kumalizika.

“Tutajenga na sio Mnali tu, zahanati zote zilizojengwa miaka ya 1980. Tumeshaanza na zahanati ya Namakongo. Na Mnali pia tutaiboresha kama ambavyo tumeiboresha katika maeneo yote ikiwemo kupeleka waatumishi, tunakwenda pia kujenga na jengo la kujifungulia”

“Niwahakikishie zahanati ya Mnali pamoja na zahanati nyengine ambazo zilijengwa kwa ramani ile ambayo ilikuwa na chumba cha kujifungulia ndani, tunakwenda kuzirekebisha kwa kujenga chumba cha kujifungulia nje. Kwa hiyo watu wa Mnali wavute Subira. Kama ambavyo tumewafanyia megine mazuri: kupeleka maji, kukarabati zahanati, kupeleka kitanda cha kujifungulia, tunapeleka dawa vizuri na hiyo ambayo wanatamani wawe na chumba cha kujifungulia nje kama ramani za sasa zinavyoonyesha tutalifanya” alisema Mhe. Ndemanga.