NAIBU WAZIRI MALIASILI NA UTALII AFIKA ENEO LA TENDAGURU NA KUELEZA MIKAKATI YA SERIKALI YA KULITANGAZA NA KULIENDELEZA

Imetumwa: July 21st, 2021

Naibu waziri wa Maliasili na Utalii mhe. Mary Masanja amefanya ziara ya kutembelea maeneo mbalimbali yenye vivutio vya utalii mkoani Lindi.Katika ziara yake ya tarehe 21/07/2021 Mhe. Mary Masanja ametembelea eneo la kihistoria duniani la Tendaguru lililopo katika kata ya Mipingo, Halmashauri ya Manispaa ya Lindi.Eneo la Tendaguru ndipo yalipogunduliwa mabaki ya mijusi ya kale (Dinasours) mnamo mwaka 1908 na Injinia waKijerumani aitwaye B. Sattler alipokuwa anafanya utafiti wake wa Sayansi ya miamba.Baada ya kuripoti mabaki hayo kwa wanasayansi wa mambo ya kale huko Berlin, nchini Ujerumani, Taassisi na Makumbusho ya Malikale ya Ujerumani ilileta wataalamu kwa ajili ya kufanya utafiti katika eneo hilo. Utafiti ulifanyika kwa kipindi cha miaka minne kuanzia 1909-1913 na mabaki ya mijusi yaliyopatikana yalisafirishwa hadi Ujerumani.

Mhe. Mary Masanja amempongeza mbunge wa jimbo la Mchinga Mhe. Salma Kikwete kwa kusimama kidete bungeni na kulizungumza suala la mabaki ya mjusi mkubwa duniani yaliyogunduliwa katika eneo la Tendaguru lilnalopatikana jimboni kwake.Mhe. Naibu waziri amesema adhma ya Serikali ilikuwa ni kusafirisha mabaki hayo kutoka huko Berlin na kuyaleta hadi katika eneo lenye chimbuko la asili yake (Tendaguru) lakini kutokana na sababu za msingi zilizotolewa, imeshindikana kusafirisha mabaki hayo.Serikali chini ya wizara ya Maliasili na Utalii imedhamiria kulitangaza na kuliendeleza eneo hilo la historia ya Taifa na Kimataifa.

Aidha, Naibu Waziri amewaagiza viongozi wa Wilaya ya Lindi na viongozi wa Manispaa ya Lindi kulilinda eneo hilo kwani baadhi ya wananchi wa jamii za kifugaji wameanzisha makazi katika maeneo yanayolizunguka eneo hilo la kihistoria."TFS mpo hapa na nawaagiza kwamba yeyote atakayethubutu kuingiza mifugo yake katika eneo hili basi achukuliwe hatua kali", alisema Mhe. Mary Masanja.Pia mhe. Naibu Waziri amewaasa wananchi wa mkoa wa Lindi Kwa ujumla kuchangamkia fursa hiyo ya serikali ya kuipa kipaumbele kanda ya kusini kwa sababu ina maeneo mengi ya kihistoria na kiutalii.Wananchi wamehimizwa kudumisha utamaduni wao na kuandaa mazingira yakayochochea utalii endelevu.

Mbunge wa Jimbo la Mchinga Mhe. Salma Kikwete na Mkuu wa Wilaya ya Lindi Mhe. Shaibu Ndemanga wameishukuru wizara ya Maliasili na Utalii na Serikali kwa ujumla kwa mikakati hiyo ya kulitambua, kulitangaza na kuliendeleza eneo hilo la Tendaguru pamoja na maeneo mengine yaliyopo katika mkoa wa Lindi.Pia  wameiomba serikali kuwashirikisha wananchi kwa ukaribu katika mikakati hiyo kwani wao ndio waliopo karibu sana na maeneo hayo ya kihistoria na kitalii.

Aidha aliyekuwa Mbunge wa viti maalum mwaka 2015-2020 Bi. Riziki Saidi Lulida aliyejipa jina la Mama mjusi amempongeza Mhe. Mary Masanja kwa kuwa kiongozi wa kwanza wa ngazi ya juu ya serikali kutembelea eneo la Tendaguru na kumsifu kwamba anafanya kazi kwa kuendana na kasi ya Mhe.Samia Suluhu Hassan, Rais wa Jamhuri ya Muungano wa Tanzania. Pia Bi. Lulida amemuomba Mhe. Naibu waziri kwamba vijana wanaozunguka maeneo ya kitalii wawezeshwe kuunda Village Game Skauti ambayo itawasaidia vijana kujihusisha na shughuli za kiuchumi kama kupatiwa mizinga kwaajili ya kufuga nyuki.Vijana hawa watakuwa walinzi wazuri wa maeneo ya kiutalii wanapokuwa wanendelea na shughuli zao za ufugaji wa nyuki.

Kaimu Mkurugenzi wa Manispaa ya Lindi Ndg. Baptista Kihanza akipanda katika mlima Tendaguru yalipogunduliwa mabaki ya mjusi mkubwa duniani.

Mbunge wa viti maalum (2015-2020) Bi. Riziki S. Lulida akitoa historia ya Tendaguru na kumshukuru Naibu Waziri wa Maliasili na Utalii kwa kulitembelea eneo hilo la kihistoria.