MKUU WA WILAYA YA LINDI ATOA WITO KWA VIONGOZI WA RUWASA KUPAMBANA NA UPOTEVU WA MAJI.

Imetumwa: June 20th, 2023

Mkuu wa wilaya ya Lindi Mhe. Shaibu Ndemanga atoa wito kwa viongozi wa RUWASA wilaya ya Lindi kupambana na upotevu wa maji katika wilaya ya Lindi.

Wito huo ameutoa Juni 20, 2023 Kwenye mkutano mkuu wa mwaka wa vyombo vya watoa huduma ya maji ngazi ya jamii (CBWSO's), uliofanyika kwenye ukumbi wa mikutano wa Ngudu Beach Resolt uliopo manispaa ya Lindi.

Sambamba na hilo Mhe. Ndemanga amewataka wanajumuiya hao kutoa hamasa kwa wananchi katika maeneo ya kuvuta huduma za maji pamoja na makazi yao ili iweze kuwarahisishia katika kutumia njia mpya za uboreshaji wa huduma wanazozitoa

Katika hatua nyingine kaimu meneja wa mamlaka ya maji safi na usafi wa mazingira vijijini (RUWASA ) Wilaya ya Lindi, Mhandisi Atanas Lume , ameeleza kuwa katika bajeti ya miradi ya maendeleo ya mwaka wa fedha 2023/2024 RUWASA wilaya ya Lindi imetenga zaidi ya bilioni 3.659 kwaajili ya kutekeleza miradi ya maji ambapo miradi mipya sita imetengewa bilioni 2.10.
Aidha amesema Halmashauri ya Manispaa ya Lindi jumla ya fedha zote kwa bajeti ya 2023/2024 ni bilioni 2.7 huku Halmashauri ya Mtama jumla ya fedha zote kwa bajeti ya 2023/2024 ni milioni 881.