MIAKA 22 (1999 - 2021) YA KUMBUKUMBU YA KIFO CHA HAYATI MWL. JULIUS KAMBARAGE NYERERE

Imetumwa: October 14th, 2021

Hayati Mwl.Julius Kambarage Nyerere alizaliwa mwezi machi 1922 Butiama Tanganyika (Tanzania kwa sasa) na alikufa akiwa na miaka 77,na kuzikwa katika kijiji cha Mwitongo Butiama Kaskazini mwa Tanzania. Alifanikisha uhuru wa Tanganyika 1961 dhidi ya ukoloni wa Muingereza.

Tanganyika ilipata uhuru mwaka 1961 chini ya uongozi wake bila kumwaga damu , jambo alilosifiwa kama mmoja wa viongozi waliokua wana Imani ya kijamaa.Mwl.Nyerere alikua akiamini katika falsafa ya Ujamaa na kujitegemea. Hayati mwl. Nyerere alifanya hotuba mbalimbali katika mikutano ya ndani na nje ya nchi wakati wa uongozi wake na hata baada ya kustaafu. Mwalimu Nyerere atakumbukwa kama Baba wa Taifa katika mambo makuu mbalimbali aliyoyafanya.

Yafuatayo ni mambo aliyopenda kuyasisitiza katika hotuba zake enzi za uhai wake:

• Ukabila - Suala la ukabila ni jambo nyeti ambalo nyerere aligusia katika hotuba nyingi alizowasilisha. Aliwahi kusema ''nilikutana na mama mmoja akaniambia alikua akifanya kazi jumuiya ya afrika mashariki, na sisi watu wa uganda tulikua tunajuana kwa makabila yetu , watu wa kenya walikua wakijuana kwa makabila yao, huyu mkikuyu, huyu mluhya. Lakini sisi watanzania hatujui makabila ya watu, nikawambia mama ni wakati huo, sasa hivi watanzania wanataka kujua makabila yao, ya nini, mnataka kutambika? Majirani zetu waalikua wanaiga kutoka Tanzania, sasa bila haya na sisi tunataka kuulizana makabila? Mwalimu Nyerere katika hotuba yake ya mkutano mkuu wa CCM 1995.
  Nyerere alikemea suala la ukabila kila wakati alipopata nafasi ya kuzungumza na hakutaka kabisa kuwe na maswali kama wewe ni kabila gani? N katika hilo alifanikiwa kwa kiasi kikubwa, si kwa kawaida nchini Tanzania kuulizana kuhusu masuala ya ukabila.
• Dini -  Jambo ambalo alisisiza sana katika hotuba zake, hasa kuwaasa viongozi wasitafute uongozi kwa kutumia dini.Aliwahi kusema ''mambo haya ya kuchochea chuki za dini yakianza na tukayapa nafasi hayana simile, ni ikifika wakati yakashika kasi hakuna wa kuzuia''.
• Ujinga, maradhi na Umaskini - Mwalimu Nyerere alisisitiza juu ya mambo haya makuu matatu, kama na aliongeza pia kama Tanganyika na baadae Tanzania itafanikiwa kuyamaliza basi itakua miongoni mwa nchi itakayoendela zaidi duniani.Katika suala la kupinga umasikini Mwal. Nyerere aliwahi kusema ''nchi hii ni bado ya wakulima na wafanyakazi, hatuwezi kuwa nchi ya watu wenye kudai na kudai, nawaomba ndugu zangu watanzania hatujalemaa sana, lakini kilema kipo, viongozi wetu wanadai na kudai tuu, watu ni maskini, wachache hao wana nguvu ya kuongoza nchi hii ndio wanaodai tuu''.
• Uongozi -  katika suala la uongozi, maadili ya uongozi ni jambo aliloliweka mbele sana, miongoni mwao ni viongozi ambao wanaweza kukidhi matarajio ya watanzania. Nukuu mojawapo ya hotuba yake akizungumzia uongozi ni ''watanzania wanataka mabadiliko, wasipoyapata ndani ya CCM, watayapata nje ya CCM, inatakiwa ukiulizwa swali kwamba huyu atapiga vita rushwa? Jibu litoke ndani ya moyo, nchi yetu ni maskini bado haijawa ya matajiri hivyo tunataka tuendelee kushughulika na umaskini wetu na matatizo ya wananchi, tunataka nchi yetu ipate kiongozi safi''. 
• Muungano - katika vitu ambavyo alikua akitamani sana kufanya ni kuunganisha nchi za Afrika mashariki, na kuwa na uongozi wa pamoja, ingawa hakufanikiwa katika hilo, alifanikiwa katika kuunganisha Tanganyika na Zanzibar mwaka 1994. Nukuu ''matumaini yangu, ilikua kuunganisha nchi hizi za Afrika mashariki na kuwa muungano mmoja, kwa upande wa Zanzibar niliongea na Karume, akasema niko tayari ita watu wa magazeti sasa hivi, nikamwambia tufanye taratibu na tukafanikiwa. Kwa Afrika mashariki tungekua na serikali tatu za kila nchi na serikali ya muungano yani ya tanganyika na muungano''.

Hayo ni baadhi ya mambo aliyopenda kusisistiza sana Hayati Mwl. Julius Kambarage Nyerere katika hotuba zake. Watanzania tukiwa tunaadhimisha miaka 22 ya kifo cha baba wa Taifa tunapaswa kuishi falsafa zake na kuyaenzi yote mazuri aliyofanya. Hakika tutamkumbuka daima shujaa wa Taifa letu.