MAKALA TASAF (PART 1): TASAF YAWA MUHIMILI MKUBWA KATIKA KUBORESHA MAISHA YA KAYA YANGU

Imetumwa: May 26th, 2018

Bi Afa Mohamed Masudi ni mama mwenye umri wa miaka 60 na ni miongoni mwa kaya 2468 zinazonufaika na Mpango wa TASAF III wa kunusuru kaya maskini sana katika Manispaa ya Lindi. Bi Afa anaishi katika Kata ya Mtanda, Mtaa wa Mtanda Juu. Mama huyu amesajiliwa kwa namba PSSN-LMC-02438-1 na amekuwa akinufaika na mpango huu wa kunusuru kaya maskini sana toka mwaka 2013 ambapo ameshapokea ruzuku kwa awamu 31.

Kaya ya Afa Mohamed Masudi ina jumla ya watu saba (7) ambapo miongoni mwao watoto ni watatu (3) na ambapo watoto wawili wanasoma shule ya msingi Mtanda darasa la pili na la nne na mmoja anasoma kidato cha kwanza shule ya sekondari Angaza. Kaya hii ina watu wazima  wanne (4) ambao ni wategemezi wa Bi Afa.  

Kabla sijajiunga na Mpango wa TASAF wa Kunusuru Kaya Maskini sana, hali yangu ya maisha ilikuwa ngumu sana hasa katika upatikanaji wa chakula kwani tulikuwa tukila mlo mmoja na mara chache sana milo miwili. Aidha uwezo wa kwenda hospitalini ulikuwa mdogo kutokana na ukosefu wa fedha ikiwa ni pamoja na kushindwa kuwagharamia wajukuu wangu mahitaji ya shule kama vile sare za shule, madaftari, kalamu na viatu. Mara nyingi wajukuu wangu walikuwa hawaendi shule kwa kukosa madaftari na kalamu. Makazi yangu nayo pia yalikuwa duni sana maana nilikuwa nikiishi katika nyumba iliyoezekwa kwa makuti na kusiribwa kwa tope na sakafu ya udongo. Kwasasa sasa toka nijiunge na TASAF maisha yameboreka kwani ninamudu kununua chakula chakutosha na hata nikienda kukopa dukani ninakopeshwa. Pia ninamudu kulipia gharama za shule kwa wajukuu wangu, nimejiunga na Mfuko wa Afya ya Jamii (CHF) na nimeboresha nyumba yangu kwa kuweka bati na kuisakafia. Maelezo haya aliyatoa Afa Mohamed Masudi.                                                                                                                       

Kaya ya Afa Mohamed Masudi imekuwa ikipokea ruzuku ya kunusuru kaya maskini toka mwaka 2013 ambapo hadi Machi 2018 amepokea mara 31. Bi Afa alianza kupokea Tsh 28,000.00 na kwasasa anapokea Tshs 56,000.00. Aidha kutokana na ruzuku ambayo imekuwa ikipokelewa na kaya hii pamoja na ujira wakati wa kazi za ajira ya muda, Bi Afa Mohamedi amemudu kuwanunulia wajukuu wake vifaa vya shule na kuboresha nyumba yake kwa kuezeka kwa bati. 

“Kutokana na mimi kuwa kwenye mpango pamoja na kuongezeka kwa ruzuku, nimemudu kuanzisha Biashara ya kununua na kuuza mkaa, nimenunua mbuzi mmoja kwa Tshs 50,000.00 ambaye kwa sasa ana mimba”, alisema Afa Mohamed Masudi.

Wakati wa mahojiano, Afa Mohamedi Masudi alisema kuwa amemudu kununua mbuzi mmoja wa maziwa na kuboresha biashara yake ya kununua na kuuza mkaa ambayo inamwingizia Tsh 3,000.00 kama faida kwa kila kiroba. Kipato anachopata kutokana na kuuza mkaa pamoja na mazao mengine ya kama vile mtama hutumika kuisaidia kaya hii kujikimu wakati ikiendelea kusubiria pesa za Mpango wa Kunusuru Kaya Maskini.

“Kipato ninachopata kwasasa kutokana na Biashara zangu binafsi kinanisaidia kujikimu kwa muda wote ambao kunakuwa hakuna malipo kutoka TASAF; ama kweli TASAF imekuwa muhimili mkubwa katika kuinua maisha ya kaya yangu”, alisema Afa Mohamed Masudi.

Wakati wa mahojiano, Afa Mohamed Masudi alisema ana vitu vingi vya kujivunia ila anajivunia zaidi kule kuwa na uhakika wa lishe (milo mitatu) kwa siku, uhakika wa matibabu kwakuwa wanakaya wana vitabulisho vya Mfuko wa Afya ya Jamii (CHF) na anauhakika wa kuwalipia wajukuu wake gharama za shule.  

Bi Afa Mohamed Masudi, alisema kuwa anawashauri wale wote ambao wapo kwenye mpango wa Kunusuru kaya maskini wasibweteke kwa kuitegemea TASAF peke yake kwani kuna siku itajiondoa katika ufadhili wake. Hivyo aliwataka wajishughulishe na shughuli zingine za uzalishaji mali kama vile kilimo, ufugaji wa mifugo na biashara ndogo ndogo. Aidha aliishukuru Serikali kwa kuzisaidi kaya maskini kuinua hali zao za maisha. Pia aliitaka kuendelea kuzisaidia kaya zingine ambazo ni maskini ili nazo zijikwamue kimaisha.

Mipango ya baadaye ya Bi Afa Mohamed Masudi ya maendeleo ili kaya yake iondokane na umaskini ni pamoja na;

• Kuongeza biashara ya kuuza mkaa
• Kuongeza shamba la mazao ya nafaka
• Kuboresha makazi ya kaya kwa kujenga nyumba ya tofali
• Kuongeza mifugo kama vile kuku

Taarifa hii imeandaliwa na Ofisi ya TASAF Manispaa ya Lindi

Mei, 2018