KIKAO CHA TAASISI ZISIZO ZA KISERIKALI (NGO's) PAMOJA NA IDARA YA MAENDELEO YA JAMII MANISPAA YA LINDI.

Imetumwa: May 23rd, 2023

Kikao hicho kimefanyika katika ukumbi wa mikutano wa Halmashauri ya Manispaa ya Lindi (DDC), ukihusisha taasisi mbalimbali zisizo za ki serikali zilizopo ndani ya Manispaa ya Lindi ikiwemo LISAWE, LUWOPAC, ROWODO, LANGO,ASUTA,  PAI, pamoja na SHIMKIMI.

Lengo la kikao hicho likiwa ni kukutanisha mashirika hayo yasiyo ya kiserikali (NGO's) yaliyopo ndani ya Manispaa ya Lindi na kuwakumbusha majukumu yao ikiwa ni pamoja  na kuwapa muongozo mpya wa serikali kama vile kutoa ripoti kwa msajilibwa NGO's kama vile ripoti ya robo mwaka , nusu na mwaka mzima.

Mgeni rasmi kwenye kikao hicho alikuwa ni Mkuu wa wilaya ya Lindi akiwakilishwa na  afisa tawala wilaya ya Lindi ndg, Herieth kalua, ambae alipata nafasi ya kuwasalimia viongozi wa taasisi hizo kabla ya kwenda kuendelea na majukumu mengine ya kiserikali.

Lakini pia kilipata kuhudhuriwa na Mkurugenzi wa Manispaa ya Lindi , Juma Mnwele. Kikao hicho kilisimamiwa na idara ya maendeleo ya jamii Manispaa ya Lindi ikiongozwa na afisa maendeleo ya Jamii Moses Mkoveke.

Mgeni rasmi  amesisitiza mambo mbalimbali kwa viongozi hao wa sekta binafsi ikiwepo suala la kuwasilisha taarifa mbalimbali kuhusiana na taasisi zao kwa msajili wa NGO's, lakini pia umuhimu wa kuzingatia sheria ,taratibu na kanuni za nchi, lakini pia kulinda maadili,mila na desturi za jamii yetu pamoja na  kutoa ushirikiano kwa serikali na serikali imeahidi ushirikiano huo na sekta hizo binafsi.

Sambamba na hilo Mkurugenzi wa Manispaa ya Lindi Juma Mnwele pia alipata nafasi ya kuongea na  viongozi wa taasisi hizo kwa kuwapongeza kutokana na shughuli kubwa wanazo zifanya katika Manispaa ya Lindi ikiwemo kushiriki katika shughuli na matukio mbalimbali ndani ya Manispaa, wilaya, na mkoa kwa ujumla.

Aidha Mnwele amewaomba viongozi hao wa taasisi zisizo za kiserikali kutoa ushawishi mkubwa  kwa wananchi katika kushiriki katika miradi ya maendeleo ya jamii. 

Vilevile ameomba taasisi hizo kuwa na umoja katika kufanya shughuli zao kwani taasisi hizo ni muhimu katika kuleta maendeleo. Pia amesisitiza taasisi hizo kutoa taarifa za ukweli  juu ya maandiko mbalimbali ya miradi na kuepuka kutoa taarifa ambazo hazina ukweli ndani yake. Lakini pia aliomba taasisi hizo kushiriki katika kupiga vita suala la  mapenzi ya jinsia moja kwa kulinda mila na desturi zetu kwani ni kinyume na Utamaduni wetu.

Mwisho muwakilishi wa taasisi hizo zisizo za kiserikali alipata kutoa neno la shukrani mbele ya mgeni rasmi kwa kusema taasisi hizo zipo tayali kushirikiana na serikali katika mambo mbalimbali ya kimaendeleo lakini pia watakuwa mabalozi wazuri kwa watu wengine katika kuhamashisha mambo mbalimbali ya kimaendeleo katika Manispaa ya Lindi na mkoa kwa ujumla.