CRDB BANK YAKABIDHI MIFUKO MIA MOJA YA SARUJI KWA SHULE YA SEKONDARI LINDI WASICHANA.

Imetumwa: March 10th, 2025

Benki ya CRDB imekabidhi mifuko mia moja  ya saruji Kwa shule ya Sekondari Lindi Wasichana iliyopo kata ya Kilangala Jimbo la Mchinga Halmashauri ya Manispaa ya Lindi, kwaajili ya Ujenzi wa uzio shuleni hapo. 

Akiongea na wanafunzi wa shule hiyo  mara baada ya kukabidhi mifuko hiyo meneja wa CRDB kanda ya Kusini Bwana Denis Mwoleka amesema mifuko hiyo ya saruji  ni muendelezo wa mambo mbalimbali ambayo yanafanywa na benki hiyo katika kurudisha Kwa Jamii.

Naye Mkuu wa Wilaya ya Lindi Mhe. Victoria Mwanziva ambaye pia alikuwa ni mgeni rasmi katika Hafla hiyo ameishukuru benki ya CRDB Kwa kutoa mifuko hiyo ya saruji lakini pia amewaomba wanafunzi katika shule hiyo kuhakikisha wanasoma kwa bidii ili waweze kufanya vizuri kwenye masomo yao. 

Akipokea mifuko hiyo ya saruji kutoka kwa meneja wa CRDB kanda ya Kusini Mstahiki Meya wa Manispaa ya Lindi Mhe. Frank Magali ameishukuru benki hiyo Kwa msaada huo ambao unakwenda kusaidia katika Ujenzi wa uzio katika shule hiyo.

Sambamba na hilo Magali ameishukuru serikali ya awamu ya sita inayoongozwa na Mhe. Dkt, Samia Suluhu Hassan Rais wa Jamhuri ya Muungano wa Tanzania Kwa kazi kubwa na nzuri anayoifanya hasa Katika Manispaa ya Lindi Mkoa wa Lindi na taifa Kwa ujumla.

Lakini pia ametumia nafasi hiyo kumshukuru Mbunge wa Jimbo la Mchinga Mhe. Salma Rashidi Kikwete Kwa kazi anayoifanya katika kuhakikisha Jimbo hilo linapata maendeleo hususani ni kata ya Kilangala.

 Pamoja na hayo naibu mstahiki Meya Halmashauri ya Manispaa ya Lindi ametoa wito kwa wazazi na walezi katika kata hiyo kuweka utaratibu wa kufanya usafi kuzunguka mazingira ya shule hiyo.

katika hatua nyingine katibu wa mbunge Jimbo la Mchinga Abdallah Mkokoi Kwa niaba ya mbunge wa Jimbo hilo ametoa kiasi Cha fedha shilingi laki tano Kwa Wanafunzi wa shule hiyo kwaajili ya kununua futari kwenye mwezi huu wa mfungo.

Ikumbukwe kuwa tarehe 09 Agosti 2024  benki hiyo chini ya meneja wake Kwa kanda ya Kusini ilikabidhi viti na meza 40 shuleni hapo ikiwa ni katika kusaidia kukuza na kuendeleza sekta ya Elimu .