ZIARA YA KIKAZI YA WAZIRI MKUU MHE. KASSIM MAJALIWA (MB) KUKAGUA MIRADI MBALIMBALI NDANI YA MKOA WA LINDI.

Imetumwa: October 5th, 2021

Waziri Mkuu wa Jamhuri ya Muungano wa Tanzania Mheshimiwa Kassim Majaliwa Majaliwa afanya ziara Mkoa wa Lindi leo tarehe 05.09.2021 ambapo kwa Halmashauri ya Manispaa ya Lindi ameweza kutembelea eneo la mizani Mnazimmoja,Tenki la maji Mitwero na kufanya ufunguzi wa gari la maji taka la LUWASA, na kutembelea eneo la mradi mkubwa wa gesi (LNG). Katika ziara yake Ndani ya Manispaa ya Mhe. Majaliwa amekagua kituo cha mizani cha Mnazi Mmoja na kutoa maagizo kwa meneja wa TANROADS mkoa wa Lindi kufanya maboresho ili kuongeza ufanisi wa mizani hiyo na kurahisisha uingiaji na utokaji wa magari. Mhe. Mjaliwa amesema Rais wa Jamhuri ya Muungano wa Tanzania ametoa fedha zaidi ya bilioni 2.469 kwa ajili ya kufanya maboresho katika vituo 42 vya mizani kikiwemo kituo hicho cha Mnazi Mmoja.Pia alitembelea eneo la Likong'o ambapo utatekelezwa mradi mkubwa wa gesi (LNG) na kupata wasaa wa kuongea na wananchi na kutoa rai kwa viongozi na wananchi wa Manispaa ya Lindi kujiandaa kikamilifu kwani mradi huo upo mbioni kutekelezwa.‘’Tunaenda kwa spidi kubwa ili mradi huu uweze kutekelezwa ikiwemo kuwa na majadiliano  na kampuni zile zinazounda kitu kimoja cha kuja kujenga mradi huu na kampuni zote tatu zinahusika na mradi huu tumefikia hatua sasa tumefanya maandalizi ya kukaa pamoja na wataalamu wetu walikuwa wanakamilisha kwenda kuanza majadiliano hii ni hatua tu ya kuelimishana kwamba sisi watanzania tunataka kiwepo  hiki ili wananchi wetu waweze kunufaika na tunawashawishi wakubali kwani wanania ya kuja kuwekeza’’, alisema Mhe. Majaliwa.

Aidha, Mhe. Majaliwa amewaambia wananchi wa Manispaa ya Lindi kujiandaa na ujio wa Rais wa Jamhuri ya Muungano wa Tanzania Mhe. Samia Suluhu Hassan ambaye atazindua utekelezaji wa mradi huo. Aliendelea kuwaambia wananchi hao kuwa wawe tayari kwa mradi kwani hakuna mashaka na yeye anasafisha njia ili Mheshimiwa Rais aweze kuja.Katika kuendelea kuongea na wananchi wa Manispaa ya Lindi Mhe. Majaliwa alitoa maagizo kwa Mkurugenzi wa TPDC ambapo amempa wiki moja kuhakikisha anachonga barabara kuelekea eneo la mradi. Mhe. Majaliwa alimpongeza Mkurugenzi wa Halmashauri ya Manispaa ya Lindi Ndg. Juma Ally Mnwele kwa kazi nzuri iliyofanyika ya ujenzi wa barabara mbalimbali ndani ya Manispaa na kumuagiza  kuanza mara moja ujenzi wa barabara ya Rutamba.

Pia Mhe. Majaliwa amewatoa hofu wananchi kuhusu suala la ajira kwenye mradi huo ambapo alisema moja ya lengo la majadiliano na wawekezaji ni kuhusu ajira kwa wa maeneo ya jirani na eneo la mradi na Lindi kwa ujumla.Ambapo ili kupanua wigo wa ajira hizo kutakuwa na mitaala ya mafunzo juu yauchakataji gesi kwenye vyuo vya VETA.Kupitia mradi wa gesi maendeleo makubwa yatafanyika ikiwemo ukarabati wa uwanja wa ndege wa Kikwetu na uhakika wa umeme masaa 24 wakutosha na kwa bei nafuu ili kuhakikisha kila mwananchi anavutia umeme nyumbani kwake.Vilevile kwenye sekta ya maji  Waziri amesema ‘’Rais wa Jamhuri ya Muungano wa Tanzania Mheshimiwa Samia Suluhu Hassan ametoa billioni mbili pointi tano ili kuweza kufanya uendelezaji miradi ya maji’’.

Aidha, Waziri  Mkuu amewahamasisha wananchi kuwekeza kwenye mambo mbalimbali yenye kuleta tija lakini pia kusapoti mradi huo ili kuleta mzunguko wa fedha.Amewashauri pia kufanya uwekezaji wa kujenga hoteli ili kuwafanya wawekezaji na wafanyakazi kulala Lindi na si sehemu nyingine.                                                                            

Mbunge wa Jimbo la LIndi mjini Mhe. Hamida Abdallah akiwasalimia wananchi wa eneo la Likong'o

 waliojitokeza katika ziara ya Waziri Mkuu Mhe. Kassim Majaliwa (Mb).

Gari jipya la Majitaka litakalotumika ndani ya Manispaa ya Lindi