WAZIRI ULEGA ATAKA WALIMA MAZAO YA BAHARI WAWEZESHWE.

Imetumwa: March 1st, 2022

Naibu waziri wa mifugo na uvuvi mheshimiwa Abdallah Ulega amewataka wanavikundi wa kilimo cha mwani na ufugaji wa samaki wawezeshwe katika nyanja mbalimbali ikiwemo kupewa mafunzo juu ya ulimaji bora wa mwani na ufugaji bora wa samaki ambapo amewashauri wakulima hao kufuga majongoo bahari,kambakochi na kunenepesha kaa ili kuleta mzunguko wa fedha.

Ameyasema hayo alipotembelea kikundi cha wakina mama walima mwani(LIKUVI) Kitumbikwela na kikundi cha wafuga samaki asm kilichopo Machole leo tarehe 01/03/2022.

                                 Naibu Waziri alipotembelea kikundi cha wafugaji samaki machole.

Ulega amewaagiza mkurugenzi wa benki ya kilimo na Dokta Mzigani kutoka chuo cha uvuvi kilichopo Mtwara Mikindani kutoa mafunzo ya haraka kwa vikundi hivyo Katika kuhakikisha hilo linatekelezwa ameahidi kurudi tena kuja kukagua utekelezaji wa maagizo hayo baada ya miezi miwili.Pia kwa changamoto zilizowasilishwa na vikundi hivyo mheshimiwa waziri ameahidi kutatua changamoto zilizo ndani ya uwezo wake ili kuwainua wanavikundi hao kwani wameonyesha utayari na ari katika kuhakikisha wanafanikiwa kiuchumi kupitia miradi yao.

Aidha amewapongeza sana wanawake ambao wanalima kilimo cha mwani kwani ni mara chache kuona wanawake kama hao wakijitoa kwa hali na mali katika kujikwamua kiuchumi hasa katika mradi walioamua kuutekeleza.Pia ametoa agizo kwa Mkurugenzi wa Manispaa kuhakikisha wanakikundi hao wanakopeshwa kupitia 10% ya makusanyo ya ndani na pia kuwajengea ghala wanakikundi hao ili waweze kuhifadhi mwani.

Mkuu wa Mkoa wa Lindi Mhe.Zainab Telack ameahidi kushirikiana vyema na vikundi hivyo na anatamani siku moja kuona Lindi ikiwa juu kiuchumi.Amewaomba wanavikundi hao kuwa na utayari wa kufanya kazi kwa bidii huku wadau wengine wakihangaika kuwatafutia masoko ya mazao hayo.

Mheshimiwa mbunge wa jimbo la Lindi mjini Mheshimiwa Hamida Abdallah amemshukuru mheshimiwa naibu waziri kwa ujio wake na vilevile kwa ahadi alizozitoa juu ya kuwatatulia changamoto zinazowakumba vikundi hivyo.Mheshimiwa Hamida ameahidi kununua Kamba kwa ajili ya kikundi wa wanawake wanaolima mwani(LIKUVI).