WAZIRI MKUU ARIDHISHWA NA MCHANGO WA TEHAMA KUPITIA MFUMO WA ELIMU MASAFA NA HURIA.

Imetumwa: March 13th, 2020

Hayo yamebainishwa katika hotuba ya Waziri Mkuu wa Jamhuri ya Muungano wa Tanzania Mheshimiwa Kassim Majaliwa ambaye alikuwa mgeni rasmi katika maadhimisho ya mahafali ya 38 ya Chuo Kikuu Huria Tanzani yaliyofanyika katika uwanja wa Ilulu mkoani Lindi tarehe 12/03/2020.

Katika hotuba yake Waziri Mkuu alisema "Tehama sasa imefikia katika hatua nzuri kwa sababu Mhadhiri au Mwalimu mmoja anaweza kuwafundisha wanafunzi wake wote popote walipo kwa njia ya mtandao.Tehama imewezesha wanafunzi waliozuiwa kurudi nchini China kuendelea na masomo wakiwa nyumbani kwao".Aliendelea kusema baada ya virusi vya CORONA kuikumba china vyuo vimefungwa na wanafunzi wanasoma kwa njia ya mtandao.Waziri mkuu aliendelea kusema serikali inatambua mchango mkubwa wa Chuo Kikuu Huria Tanzania na serikali inakiangalia kwa jicho la karibu sana kwa kuwa kimekaa kimkakati zaidi kwa mustakabali wa maendeleo ya Taifa.

"Licha ya changamoto mbalimbali zilizopo, Serikali imeweza kuanzisha chuo hicho na kukiona kikiendelea kutanuka hadi nje ya mipaka ya nchi yetu. Haya ni mafanikio makubwa na ya kujivunia. Tunawashukuru waasisi wa Taifa letu kwa maono haya makubwa kuhusu Tanzania." Waziri Mkuu alitoa rai kwa mamlaka zinazohusika na elimu ya juu kuongeza udahili kwenye elimu ya juu, alishauri wabuni kozi au programu za maandalizi kwa wale wanaotaka kusoma stashahada na wale wa vyeti pia.Alisema matokeo ya programu hizo yataongeza ushiriki wa watanzania wengi kwenye elimu ya juu."Wito wangu kwa TCU nchini kuhakikisha inasimamia na kuongoza, kwa kushirikiana na Chuo Kikuu Huria Tanzania katika uanzishwaji wa programu hizi kwa kuzingatia viwango vya juu vya ubora wa elimu ya juu."

Pia, Waziri Mkuu amewaeleza wahitimu wa Chuo Kikuu Huria Tanzania kuwa vyeti walivyotunukiwa ni tuzo halali kwa juhudi na jitihada walizoonyesha katika masomo yao, hivyo wanaporejea kwenye jamii wahakikishe wanaipatia tuzo ya utendaji bora na ufanisi itakayoakisi viwango vilivyoainishwa kwenye vyeti vyao."Nendeni mkaidhihirishe tuzo hii ya pili katika utendaji wenu wa maisha yenu ya kila siku, iwe ni katika sekta rasmi au sekta isiyokuwa rasmi.Hakikisheni mnaonyesha tofauti katika kutafuta majibu ya maswali mbalimbali yanayowakabili watanzania kuhusu mustakabali mzima wa kujiletea maendeleo."