WASIMAMIZI WA UCHAGUZI WAPIKWA KUFUATA KANUNI ZA UCHAGUZI

Imetumwa: November 22nd, 2024

Wasimamizi wa Uchaguzi Wapewa Mafunzo Maalum ya Kufuata Kanuni za Uchaguzi Kabla ya Uchaguzi wa Serikali za Mitaa

Ikiwa zimebaki siku chache kuelekea Uchaguzi wa Serikali za Mitaa, utakaofanyika tarehe 27 Novemba 2024, wasimamizi wa uchaguzi ngazi za vituo wamepewa mafunzo maalum kuhusu utekelezaji wa majukumu yao katika kuhakikisha uchaguzi unafanyika kwa uwazi, haki na amani.

Mafunzo hayo yaliyoandaliwa na Halmashauri ya Manispaa ya Lindi, yalifanyika leo, Novemba 22, 2024, katika ukumbi wa mikutano wa Dockyard, Manispaa ya Lindi. Washiriki walikuwa ni wasimamizi wa uchaguzi kutoka kata 17 za Manispaa ya Lindi.

Akifungua mafunzo hayo, Mkuu wa Wilaya ya Lindi, Mheshimiwa Victoria Mwanziva, aliwataka wasimamizi wa uchaguzi kufuata kwa umakini miongozo na kanuni za uchaguzi ili kuhakikisha mchakato wa uchaguzi unafanyika kwa ufanisi. Aliwashauri wasimamizi hao kuwa makini katika majukumu yao na kuhakikisha kuwa kila hatua ya uchaguzi inatekelezwa kwa usahihi.

“Ni muhimu kwa wasimamizi wa vituo kufuata kila hatua ya miongozo na kanuni za uchaguzi, ili kuepuka dosari yoyote inayoweza kujitokeza. Hii ni hatua muhimu kwa ustawi wa demokrasia yetu na kwa ustawi wa jamii yetu,” alisema Mheshimiwa Mwanziva.

Pia, Mheshimiwa Mwanziva alisisitiza umuhimu wa kudumisha amani na utulivu wakati wa uchaguzi, na aliwataka wasimamizi hao kutoa majibu bora kwa wapiga kura siku ya uchaguzi. Aliwahimiza wasimamizi kuwa mstari wa mbele katika kuhakikisha kuwa mchakato wa uchaguzi unafanyika kwa amani, bila ya kuingiliwa na hali yoyote ya vurugu.

Mafunzo hayo yalifunguliwa na Msimamizi wa Uchaguzi wa Halmashauri ya Manispaa ya Lindi, Juma Mnwele, ambaye pia alisisitiza kwamba wasimamizi wa uchaguzi wanawajibika kwa usimamizi wa haki, uwazi na usalama wa wapiga kura.

Mafunzo zaidi yataendelea kesho, Novemba 23, 2024, huku lengo likiwa ni kuimarisha ufanisi wa wasimamizi wa uchaguzi na kuhakikisha uchaguzi wa Serikali za Mitaa unafanyika kwa kuzingatia muongozo wa Kanuni za Uchaguzi.