RC-TELACK ATOA PONGEZI KWA MANISPAA YA LINDI KWA KUPATA HATI SAFI KWA UKAGUZI ULIOPITA.

Imetumwa: June 6th, 2023

Pongezi hizo amezitoa  juni 6, 2023 kwenye kikao cha baraza la madiwani kikao ambacho kilikuwa na lengo la kujadili,Kupitia na kutoa maoni juu ya utekelezaji wa hoja za mdhibiti na mkaguzi mkuu wa hesabu za serikali (CAG), kwa mwaka 2021/2022.

Kikao hicho kimefanyika katika ukumbi wa wa mikutano wa Manispaa ya Lindi (DDC). Huku mgeni rasmi akiwa ni mkuu wa mkoa wa Lindi Mh.Zainab Telack.

Sambamba na hilo Telack amemuomba mstahiki meya wa Manispaa ya Lindi Mh.Frank Magali kumsaidia Mkurugenzi wa Manispaa ya Lindi Juma Mnwele kutafuta vyanzo vipya vya mapato ili halmashauri ya Manispaa ya Lindi iweze kujiendesha, lakini pia amesisitiza suala la uchumi wa bluu kupitia kilimo cha mwani na kuangalia ni jinsi gani wanaweza kuwawezesha kina mama ili waweze kuchangia kuongeza pato la Halmashauri yetu.

Aidha Telack, alitumia nafasi hiyo kuwaalika wajumbe wa kikao hicho kwenye jukwaa la biashara litakalo fanyika juni 7, 2023, jukwaa ambalo litakwenda kuangalia ni jinsi gani tunaweza kuinua mkoa wetu katika suala zima la biashara. Lakini pia alizungumzia tamasha la madini na uwekezaji litakalofanyika wilaya ya Ruangwa kuanzia tarehe 21-26 mwezi huu.

Awali mkuu wa wilaya ya Lindi Mh. Shaibu Ndemanga , alitoa pongezi kwa mstahiki meya wa Manispaa ya Lindi, Mh. Frank Magali, watendaji pamoja na madiwani kwa kikao hicho kizuri. Lakini pia alitoa pongezi kwa CAG kwa kuwa washauri wazuri. 

Mwisho, Ndemanga alimuomba mstahiki meya wa Manispaa ya Lindi Mh.Frank Magali pamoja na Mkurugenzi wa Manispaa ya Lindi Juma Mnwele kumpa ushirikiano mkaguzi wa ndani ili aweze kufanya kazi zake vizuri ili tuweze kupata hoja ambazo tunaweza kuzipatia majibu.