MKUU WA WILAYA ASHIRIKI UJENZI WA KITUO CHA AFYA.

Imetumwa: October 8th, 2021

Mkuu wa Wilaya ndugu Shaibu Ndemanga ametembelea na kushiriki ujenzi wa kituo cha afya cha tarafa ya mchinga kinachojengwa katika kata ya Mvuleni kijiji cha Mvuleni ambapo pia aliambatana na Mkurugenzi wa Manispaa na timu ya wataalamu wa idara mbalimbali.

 Ujenzi wa kituo hiko utatumia kiasi cha shilingi milioni 250 kwa hatua za ujenzi wa majengo matatu,jengo la OPD,maabara na kichomea taka.Baada ya kukamilika kwa majengo hayo milioni mia mbili hamsini zitaombwa ili kununua vifaa tiba na madawa ili kuanza kutumia kituo hiko.Kwasasa kituo hiko kipo kwenye hatua ya kuchimba msingi.

Aidha,Ndugu shaibu Ndemanga ameongea na wananchi na kuwaambia kuwa waache migogoro isiyokuwa na msingi ili kuweza kujadili maendeleo Zaidi na si kusuluhisha migogoro kwani jimbo la Mchinga limeonekana kuwa na migogoro mingi inayopelekea kushusha kasi ya kufanya miradi ya maendeleo kwa wakati.

Vilevile amewaomba wananchi kuhakikisha wanajitolea ili kuweza kuendana na kasi ya matumizi ya pesa ili kuweza kumaliza haraka na kuomba zingine,lakini pia kujitolea kwenye miradi ya maendeleo ni lazima na siyo hiyari.Amewaagiza kuweka daftari kwa watakaofika kujitolea lakini pia watakaoajiriwa kwa kazi ya vibarua ni wale wanaojitolea ndio watapewa kipaumbele.

Kutokana na ukosefu wa maji katika eneo hilo la ujenzi wa kituo cha afya Ndemanga ameagiza kuundwa kwa timu ya vijana kumi watakaozunguka na wataalamu kutoka bonde la mto Ruvuma watakaokuja kufanya utafiti kwenye eneo la kuzunguka ujenzi huo ili kujua wapi wataweza kupata maji na kuweza kuchimba,ili ujenzi utakapoanza isichukue muda mrefu kupata maji ya uhakika na kuachana na maji ya kuletwa na wananchi.

Mkuu wa Wilaya ametoa pongezi za dhati kwa wananchi kwa juhudi wanazozionyesha kwenye ujenzi huo kwani wameonyesha kiu na ari ya kutaka maendeleo.

Aidha kwa kuongezea amewashauri wanachi kuhakikisha mwakani wanashiriki vema zoezi la sense ya watu na makazi ili kuweza kupata idadi kamili ya watu iweze kusaidia kwa mambo ya maendeleo kwani maendeleo hufanywa kulingana na idadi ya watu wa sehemu husika.Kwahiyo waachane na Imani potofu juu ya zoezi la sensa na kuhakikisha wanatoa taarifa sahihi siku ya zoezi hilo.