MKUU WA WILAYA AFANYA ZIARA KUKAGUA MIRADI.

Imetumwa: June 14th, 2022

Mkuu wa Wilaya ya Lindi Ndugu Shaibu Ndemanga amefanya ziara kutembelea miradi ya maendeleo Manispaa ya Lindi leo tarehe 14/06/2022 ambapo ametembelea mradi wa ujenzi wa shule ya sekondari ya kata kilangala na ujenzi wa shule ya sekondari ya kata Mingoyo.

Aidha ametoa maagizo kwa wasimamizi wa miradi hiyo kuhakikisha mafundi wanalipwa kwa wakati na kuhakikisha vifaa vyote vilivyobakia ili kuweza  kumalizia ujenzi vinanunuliwa kuwezesha ukamilishaji wa miradi kwa wakati.

Pia amewaagiza mafundi kufanya kazi masaa 24 ili waweze kumaliza kwa haraka kwani muda uliobaki ni mchache.Ambapo kupitia agizo hilo Mkuu wa Wilaya amemuagiza Mkurugenzi kununua tochi za sola ili kuwezesha kazi kufanyika nyakati za usiku kwenye miradi hiyo.

Ujenzi wa shule hizo umefikia kiwango cha asilimia 60 kwa shule ya Kilangala na asilimia 65 kwa shule ya sekondari Mingoyo

Mkuu wa Wilaya amekemea tabia ya mafundi walioingia mikataba kwa ajili ya ujenzi wa shule hizo kutokuwepo sehemu za kazi kwani inapelekea udhorotaji wa kasi ya maendeleo ya miradi.

Ndemanga ameagiza kuwa hadi kufikia tarehe 24.06.2022 miradi yote iwe imekamilika ili ifikapo tarehe 25.06.2022 aweze kukabidhiwa shule kamili mbele ya wananchi wa kata hizo.