MHE. VICTORIA MWANZIVA AHAMASISHA UJENZI WA MADARASA SHULE YA MSINGI MKWAJUNI, LINDI.

Imetumwa: February 7th, 2026

Leo tarehe 07 Februari, 2026, Mkuu wa Wilaya ya Lindi, Mhe. Victoria Mwanziva, ameongoza zoezi la kujitolea la uchimbaji wa msingi wa ujenzi wa vyumba vinne vya madarasa katika Shule ya Msingi Mkwajuni, iliyopo Kata ya Kitomanga, Jimbo la Mchinga.

Mhe. Mwanziva aliambatana na wataalamu wa Halmashauri kutoka Idara ya Elimu Msingi wakiongozwa na Mkuu wa Idara, Mwl. Said Farahani, pamoja na Msaidizi wa Mbunge wa Jimbo la Mchinga, Ndugu Abdallah Mkokoi. Zoezi hilo ni sehemu ya utekelezaji wa ujenzi wa madarasa unaofadhiliwa na Serikali kwa gharama ya shilingi milioni 96, fedha zilizopatikana kupitia jitihada za Mkurugenzi wa Halmashauri ya Manispaa ya Lindi.

Ujenzi huo umechukuliwa kama hatua ya haraka kufuatia madhara ya upepo mkali na mvua uliosababisha kuondoka kwa paa za vyumba viwili vya madarasa, nyumba mbili za watumishi pamoja na vyoo, hali iliyowaweka wanafunzi katika mazingira hatarishi ya kujifunzia.

Akizungumza na wananchi waliojitokeza kushiriki katika zoezi hilo, Mhe. Victoria Mwanziva alisema:

“Ninatoa shukrani za dhati kwa Serikali ya Jamhuri ya Muungano wa Tanzania chini ya uongozi wa Rais Dkt. Samia Suluhu Hassan kwa kuwezesha upatikanaji wa fedha hizi kwa wakati, pamoja na kumpongeza Mkurugenzi wa Halmashauri kwa kuhakikisha maelekezo ya Serikali yanatekelezwa ili wanafunzi warudi kujifunza katika mazingira salama haraka iwezekanavyo.”

Mhe. Mwanziva pia alimshukuru Mbunge wa Jimbo la Mchinga na wananchi wa Kijiji cha Mkwajuni kwa kujitokeza kwa wingi na kushiriki kikamilifu katika zoezi la kujitolea, huku akibainisha kuwa kazi ya uchimbaji wa msingi na ujenzi wa madarasa imeanza rasmi.