MANISPAA YA LINDI YAKABIDHIWA PIKIPIKI KUTOKA BODI YA KOROSHO TANZANIA.

Imetumwa: September 22nd, 2022

Mkoa wa Lindi wawakilisha mikoa yote inayolima korosho Tanzania katika hafla ya uzinduzi na ugawaji wa pikipiki kwa maafisa ugani wa maeneo yanayolima korosho kwa wingi.Hafla hiyo imefanyika leo katika ofisi ya Mkuu wa mkoa wa Lindi ambapo viongozi na wataalamu mbalimbali wameweza kuhudhuria.Mgeni rasmi wa hafla hiyo ni Mkuu wa Wilaya ya Lindi ndugu Shaibu Ndemanga akimuwakilisha Mkuu wa Mkoa wa Lindi Mhe.Zainab Tellack.

Akizungumza kwenye hafla hiyo Mwenyekiti wa Bodi ya korosho Tanzania Brigedia Jenerali mstaafu Aloyce  Damian Mwanjile amesema Jumla ya kiasi cha fedha shilingi milioni 297 zimetumika katika manunuzi ya pikipiki 95 ambapo zitagawiwa kwenye mikoa inayolima korosho ili kuweza kuongeza ufanisi na tija kwenye zao hilo.Pikipiki hizo zitagawiwa pia kwenye Halmashauri kwa kuzingatia jiografia ya maeneo husika.

Mwenyekiti wa Bodi pia amesema kwa kutoa vitendea kazi hivo wanaamini kuwa lengo la kupata tani laki saba litafikiwa kama maagizo ya Mhe.Rais yanavyosema hivyo basi manunuzi ya vitendea kazi yatakuwa endelevu kuhakikisha lengo linafikiwa.

                            Mwenyekiti wa Bodi ya Korosho Tanzania akitoa neno kwenye hafla hiyo.

Aidha,Mkuu wa Wilaya ameipongeza Bodi ya Korosho kwa kutoa vitendea kazi hivyo kwani ilikuwa ni changamoto ya muda mrefu ambapo ilikuwa inawakabili maafisa ugani wa maeneo hayo.Katika kuhakikisha pikipiki hizo zinafanya kazi ipasavyo na kwa muda mrefu ametoa wito kwa Halmashauri zote kuhakikisha wanawawezesha mafuta na matengenezo ya pikipiki hizo.

Pia kuhakikisha pikipiki hizo zinagawiwa pasipo upendeleo ili kuwapa motisha maafisa ugani katika utendaji kazi wao.Bw.Ndemanga amewataka maafisa ugani kutumia pikipiki hizo kwa lengo husika na sio shughuli binafsi mbali na kuwahudumia wakulima wa korosho katika maeneo yao.

Kupitia hafla hiyo Mkurugenzi  wa Halmashauri ya Manispaa ya Lindi Ndugu  Juma Mnwele  ameweza kusaini hati ya makabidhiano ya pikipiki hizo kwa Manispaa ya Lindi.

         Mkurugenzi wa Bodi ya Korosho na Mkurugenzi wa Manispaa ya Lindi wakisaini Hati ya makabidhiano ya pikipiki za Halmashauri ya Manispaa ya Lindi.