MANISPAA YA LINDI KUFIKIA 100% UTOAJI MIKOPO MWISHO WA MWAKA.

Imetumwa: February 2nd, 2022

Halmashauri ya Manispaa ya Lindi imeendelea kutekeleza takwa la kisheria la kutenga na kutoa fedha za 10% ya mapato ya ndani ili kuwezesha mkopo kwa vikundi vya wanawake,vijana na wenye ulemavu.Leo hii tarehe 02/02/2022 Halmashauri ya Manispaa ya Lindi imetoa mkopo wa shilingi 100,500,000.Ambapo katika fedha hizi shilingi 84,500,000.00/= ni asilimia 10% ya mapato ya ndani na kiasi cha shilingi 16,000,000 kimetokana na fedha za marejesho ya mikopo.Hafla ya utoaji wa mikopo hiyo imefanyika eneo la stendi kuu ya mabasi ambapo mgeni rasmi ni Mkuu wa Wilaya ndugu Shaibu Ndemanga,Hafla hiyo imeweza kuhudhuriwa pia na Mkurugenzi wa Manispaa,Mstahiki Meya,madiwani na wataalamu mbalimbali.

Mkuu wa Wilaya amewataka wanavikundi kuwa waaminifu katika kurudisha marejesho ya mikopo hiyo ili wengine wapate kunufaika nayo.Amewaonya kutovunja kikundi kwa namna yoyote mpaka pale watakapomaliza marejesho ya mkopo.Bwana Ndemanga ametoa pongezi kwa Mkurugenzi na wataalamu kwa kazi kubwa wanayoifanya katika kuhakikisha vikundi vinapata mikopo pia kwa hatua kubwa waliyoipiga kufikia 95% kwa mwaka wa fedha 2021/2022 katika utoaji mikopo.

Mkurugenzi ameahidi hadi kufikia mwisho wa mwaka wa fedha mwezi juni watakuwa wametoa mikopo kwa 100%.Aidha,Mkurugenzi amewataka wanakikundi kutoa taarifa ikitokea wameombwa chochote ambacho ni kinyume na utaratibu kwani mikopo hiyo haihitaji kurudisha fedha kwa maana ya rushwa ama shukrani kwani jukumu la serikali kuwahudumia wananchi.Aidha,Mstahiki Meya wa Manispaa Mhe.Frank Magali amewaasa wananchi wa Lindi kulipa stahili zinazotakiwa ili kuwezesha upatikanaji wa makusanyo ya ndani ambayo ndio yanapelekea kutoa 10% ya makusanyo kwa ajili ya kutoa mikopo kwa vikundi.