KIKAO CHA VIONGOZI WA WAENDESHA BODA BODA NA WAMACHINGA PAMOJA NA UONGOZI WA MANISPAA YA LINDI.

Imetumwa: March 3rd, 2023

Leo tarehe 3 Machi 2023, kulikuwa na kikao kati ya Mkurugenzi wa Manispaa ya Lindi pamoja viongozi wa waendesha Bodaboda na wamachinga(wafanya (biashara wadogo wadogo).Kikao hicho kimefanyika katika ofisi ya Halmashauri,kikiwa na lengo la kujadili ujio wa fedha kiasi cha shilingi 10,000,000,kwaajili ya ujenzi wa ofisi yao.

Fedha hizo ni kwaajili ya kuboresha mazingira ya wamamchinga,wajasiriamali wadogo na bodaboda kama ambavyo Rais wa jamhuri ya muungano wa Tanzania Mhe. Dkt. Samia Suluhu Hassan alivyo ahidi na sasa ametekeleza.

Katika kikao hicho mambo mbalimbali yamejadiliwa kwaajili ya ujemzi wa ofisi hiyo lakini pia eneo ambalo litatumika katika ujenzi wa ofisi hiyo, ambapo eneo lililopo pembezoni mwa soko la uwanja wa fisi upande wa kushoto karibu na  barabara kuu iendayo Dar es salaam lilipitishwa kwaajili ya ujenzi wa ofisi hiyo.

Sambamba na hilo mkurugenzi wa Manispaa ya Lindi Ndg Juma Mnwele,alisema uwepo wa ofisi ya bodaboda na wamachinga katika Manispaa ya Lindi,  itatumika kama kitambulisho kuwa waendesha bodaboda pamoja na wamachinga ni huduma rasmi.Lakini pia Mkurugenzi wa Manispaa ya Lindi alitoa ahadi kuwa Manispaa itachangia tofali 500 kwaajili ya ujenzi wa ofisi hiyo.

Katika hatua nyingine Afisa maendeleo ya jamii Manispaa ya Lindi Ndg. Moses Mkoveke aliwaomba viongozi wa boda boda na wamachinga  ambao kwa kiasi kikubwa ni vijana kuchangamkia fursa ya fedha zinazo tolewa na serikari kwaajili ya wajasiriamali vijana lakini pia kuwa na uwezo wa kubuni vitu ambavyo vinaleta manufaa na huduma katika jamii zetu.

Vilevile mwenyekiti wa  waendesha boda boda Manispaa ya Lindi  ndg, Omari Doa Omari,alitoa shukurani kwa serikari ya jamhuri ya muungano wa Tanzania inayo ongozwa na Dkt Samia Suluhu Hassan kwa kutoa kiasi cha fedha kwaajili ya ujenzi wa ofisi yao ambayo kwa njia moja ama nyingine itakwenda kuwa mkombozi kwa waendesha boda boda na wamachinga lakini pia ofisi hiyo itakwenda kuwa kitambulisho chao katika jamii. Doa pia aliahidi kupita kwenye vituo mbalimbali vya boda boda ndani ya Manispaa ya Lindi na kuhamasisha waendesha boda boda kushiriki katika ujenzi wa ofisi hiyo kwa namna moja ama nyingine

Mwisho mkurugenzi wa Manispaa ya Lindi Ndg .Juma Mnwele alipata nafasi ya kuambatana na viongozi hao wa waendesha boda boda  pamoja na wamachinga na kwenda kuangalia eneo ambalo limepitishwa kwaajili ya ujenzi wa ofisi hiyo ili taratibu za vipimo kwenye eneo hilo na ujenzi ziweze kuanza.