KAMATI YA LAAC YAPONGEZA UONGOZI NA WALIMU WA SHULE YA SEKONDARI LINDI PAMOJA NA KUTOA MAELEKEZO KWA TAMISEMI

Imetumwa: March 23rd, 2023

Kamati ya Kudumu ya Bunge ya Hesabu za Serikali za Mitaa(LAAC) imewapongeza viongozi na walimu wa Shule ya Sekondari Lindi kwa kuhakikisha wanatimiza wajibu wao kwenye usimamizi wa rasilimali fedha na watu na kuifanya elimu kuwa bora na kuongeza ufaulu Mkoani Lindi

Hayo yamesemwa Machi 23, 2023 na Mwenyekiti wa Kamati ya Kudumu ya Bunge ya Hesabu za Serikali za Mitaa Mhe. Halima Mdee (Mb) wakati wa ziara ya kikazi ya kukagua miradi ya maendeleo katika Manispaa ya Lindi Mkoani Lindi.

Lengo la ziara hiyo katika shule ya sekondari Lindi ni kutaka kujua matumizi ya fedha zilizotolewa na serikali zilivyotumika  kwa ajili ya ukarabati.

Mdee alisema “hii kamati ya LAAC inawakilisha Bunge la Jamhuri ya Muungano wa Tanzania ni vizuri tujue fedha hizi zilizoletwa hapa zimetumikaje” .

Awali akisoma taarifa Mkuu wa Shule ya Sekondari Lindi Bw. Ramadhani Divele ameishukuru Serikali kwa kuendelea kuboresha na kuweka mazingira mazuri katika sekta ya elimu ambapo zaidi ya shilingi milioni 725 na zilitolewa kwa ajili ya ukarabati wa shule hiyo.

Amefafanua kuwa fedha hizo zilifanya ukarabati wa vyumba vya madarasa 17, nyumba za walimu 7, mabweni 6, bwalo la chakula 1, matundu ya vyoo 37 maabara 3 na kuweka mifumo ya gesi na maji, jengo la utawala, jiko na stoo ya chakula.

Lakini pia Amesema fedha hizo za ukarabati zilitokana na programu ya EP4R lakini pia shule ilipokea tsh. milioni 10 kutoka Ofisi ya Mkurugenzi wa Manispaa ya Lindi kwa ajili ya kulipia gharama za maji na mafundi waliokuwa wamekarabati nyumba sita za walimu.

Katika hatua nyingine Divele alisema uwepo wa mazingira rafiki ya kujifunzia na kufundishia imesaidia kupanda kwa taaluma lakini pia umoja na ushirikiano baina ya walimu kwa walimu, wanafunzi kwa walimu na wanafunzi kwa wanafunzi amewezesha kufanya vizuri kwenye mitihani ya kidato cha sita kwa miaka mitatu kutoka 2020-2022.

Vilevile  Divele  alisema shule hiyo ina jumla ya wanafunzi 1,448 wasichana 460 na wavulana 988 na kwa upande wa kidato cha nne inafanya vizuri na kuendelea na jitihada kuhakikisha ufaulu unaongezeka na kufika asilimia 100.

Sambamba na hilo Kamati ya Kudumu ya Bunge ya Hesabu za Serikali za Mitaa (LAAC) imeitaka Ofisi ya Rais –TAMISEMI kufanya uchunguzi na kuchukua hatua kwa watendaji watakaobainika wamekiuka Sheria, Kanuni na Taratibu za utekelezaji wa miradi ya mendeleo .

Hayo yamebainishwa leo tarehe 24 Machi, 2023 na Mwenyekiti wa Kamati ya Kudumu ya Bunge ya Hesabu za Serikali za Mitaa Mhe. Halima Mdee (Mb) wakati wa majumuisho wa ziara katika Halmashauri ya Wilaya ya Nachingwea, Halmashauri ya Wilaya ya Mtama na Manispaa ya Lindi, Mkoani Lindi.

“hii sio tu kwa Halmashauri hizi za Mkoa wa Lindi hapa nazungumzia Halmashuri zote nchini watendaji wanaokiuka kufuata Taratibu, Sheria na Kanuni za utekelezaji wa miradi wachukulie hatua”amesisitiza Mhe.Mdee

Mdee ameishauri Ofisi ya Rais –TAMISEMI kushughulikia suala la ongezeko la watumishi katika Sekretarieti za Mikoa na Mamlaka za Serikali za Mitaa ili kuwe na ufanisi na ubora wenye tija katika utekelezaji wa shughuli za maendeleo hasa katika usimamizi wa miradi na utoaji wa huduma bora kwa wananchi.

Amesema suala la utoaji wa mikopo ya asilimia 10 watendaji wanatoa huduma hizo lakini pia hawafuati kanuni zilizopo kwenye utoaji wa mikopo kama inavyotakiwa na Serikali.

“Mhe. Rais wa Jamhuri ya Muungano wa Tanzania Mhe. Dkt. Samia Suluhu Hassan wakati anatimiza miaka miwili alisema asilimia kubwa ya mikopo hii inayotolewa hua hairudi hivyo ni wajibu wa Wakurugenzi kusimamia mikopo”amesema Mhe. Mdee

Ameishauri Ofisi ya Rais- TAMISEMI kuongeza kigezo cha urejeshaji wa mikopo ya asilimia 10 ambapo Serikali iliweka dhamira njema ya kuwasaidia wananchi lakini inaonekana dhamira hiyo inatumiwa vibaya.

Aidha, Kamati imeishauri Ofisi ya Rais- TAMISEMI miongoni mwa vigezo vya kupima ustadi wa Wakurugenzi wa Mamlaka za Serikali za Mitaa kiongezwe kigezo cha ufanisi wa Mkurugenzi katika kutoa mikopo na kufuatilia ipasavyo marejesho ya mikopo hiyo.

Mwenyekiti wa Kamati ya Kudumu ya Bunge ya Hesabu za Serikali za Mitaa imewataka Wakurugenzi hao kutambua kuwa wameaminiwa na Rais Samia ili kumsaidia kwa kufanya kazi kwa uadilifu, na uaminifu mkubwa.